Өңірлік коммуникациялар қызметінде өткен баспасөз конференциясында облыс әкімінің орынбасары Руслан Рүстемов Қорқыт Ата күнін белгілеу жайында айтты.
- Өткен жылдың басты жетістіктерінің бірі, аймағымыздың мәдени бренді Қорқыт Ата мұралары Шығыс Африкадағы Маврикий Республикасында 217 мемлекет қатысқан ЮНЕСКО-ның 13-сессиясында Біріккен Ұлттар Ұйымы жанындағы ЮНЕСКО-ның ғаламдық мәдени мұралар тізіміне енгізілді. Бұл - біз үшін үлкен жеңіс. Аймақ басшысының қолдауымен 2013 жылдан бастап облыс әкімдігі жанындағы тарихи-мәдени ескерткіштерді қорғау және пайдалану, сақтау ғылыми кеңесінің нәтижелі еңбегі. Ғалымдарымызбен бірлесіп жасаған жұмыстарының қорытындысы. Бұл Сыр халқының ғана емес, түркі әлемінің жеңісі. Сондықтан биылғы 27 қарашаны өңірдің халқы қолдау білдіріп жатса, Қорқыт Ата күні деп жариялауға ұсыныс білдірдік. Әрине, мұның барлығы алдағы күннің еншісінде шешілмек, - деді ол.
Бақтияр ТАЙЖАН,
«Egemen Qazaqstan»
Қызылорда облысы