Жұма, 4 мамыр 2012 8:26
Акцияға қатысқан әр жастың жүрегіне осындай ой ұялады
Республикалық «Болашақ бүгіннен басталады» акциясының аясында қызықты іс-шаралар жалғасын тауып отыр. Жақында Қостанай қаласында «Мен әскерге шақырылдым» шарасы өтті. Оған облыс орталығындағы мектептердің жоғары сынып оқушылары мен колледждер студенттері, әскери-патриоттық клубтар мүшелері қатысты.
Жұма, 4 мамыр 2012 8:26
Акцияға қатысқан әр жастың жүрегіне осындай ой ұялады
Республикалық «Болашақ бүгіннен басталады» акциясының аясында қызықты іс-шаралар жалғасын тауып отыр. Жақында Қостанай қаласында «Мен әскерге шақырылдым» шарасы өтті. Оған облыс орталығындағы мектептердің жоғары сынып оқушылары мен колледждер студенттері, әскери-патриоттық клубтар мүшелері қатысты.
Жастар алдымен Қостанай қалалық қорғаныс істері жөніндегі басқармасында болып, оның жұмысымен танысты. Басқарма бастығы Өркен Өтебасов оларға жастарды әскерге шақыру науқанындағы жұмыстар жөнінде айтып берді. Ол шарт жасасу мен салаға енгізілетін тың жаңалықтарды да ортаға салды.
Әскер қатарына көктемгі шақыру жұмыстары сәуір айында басталды. Биыл Ақтау қаласындағы еліміздің әскери теңіз флотына облыстан алғаш рет 25 жауынгер аттандырылды. Бұрын Қостанай өңірінен қорғаныс саласындағы мұндай бағытқа сұраныс аз болатын. Облыста әскери мамандыққа жастарды баулу жұмыстары да жемісті жүргізіліп келеді. Шараға жиналған жастардың әскери жоғары оқу орындарына түсу үшін қандай талаптар қойылатындығы туралы сауалдарына да мамандар жауап берді.
Жастар осы кездесуде ІІІ дәрежелі «Айбын» орденінің иегері Самат Тұрмағанбетовпен еркін әңгімелесті. Бүгінде Қостанай қалалық қорғаныс істері жөніндегі басқарма келісім-шартпен қызмет ететін әскери қызметкерлерді жинау бөлімінің бастығы лауазымындағы С.Тұрмағанбетовті әріптестері елдің нағыз патриоты деп біледі. Ол да бүгінгі жастардай Отан алдындағы әскери борышын өтеуге Қостанай ауданынан аттанған болатын. Қапшағай қаласындағы әскери бөлімшедегі инженерлік сапер бригадасында алты ай дайындықтан өтті. Білікті маманды Қарағанды облысының Балқаш қаласындағы артиллериялық қоймадан өрт шыққанда оқ-дәрілерді залалсыздандыру үшін жедел сонда жіберілді.
– 2001 жылы сол жердегі қоймада өрт шығып, оқ-дәрілер жарылды. От тиіп үлгермеген оқ-дәрілерді біз залалсыздандырдық, – деді С.Тұрмағанбетов болашақ сарбаздардың алдында. Сол жолы ол мыңнан астам оқты жарылуға жеткізбей жылдамдықпен залалсыздандырып үлгерген еді. Оның тобы өртеніп жатқан қызыл оттың ішінде ержүректік танытты. Мұны Самат ерлік емес, Отан алдындағы парызымыз деп біледі. Ерлік ісі мемлекеттік наградамен аталып өткен сарбазға сол жолы әскер қатарында қалып, келісім-шарт бойынша қызмет істеу ұсынылды. Ол бүгінгі күні әскери қызметте табысты еңбек етіп келеді.
Жастар №6697 әскери бөлімшесіне келіп, сарбаздар өмірімен танысты. Олар кинологтар үйреткен иттермен жүргізілетін жұмыстарды тамашалады. Сондай-ақ, болашақ сарбаздар әскери бөлімшедегі бүгінгі қолданыстағы әскери техникалар мен қару-жарақ түрлерімен танысты. Олардың назарына түрлі қорғаныс көріністері ұсынылды.
Шараға қатысқан автомобиль жолдары колледжінің студенті Зәкір Сайдуллаев – қаладағы «Қайсар» әскери-патриоттық клубының белсенді мүшесі. Ол оқуын бітірген соң, Отан алдындағы әскери борышын өтеп, одан әрі әскери қызметкер болуды армандайды.
– Мен бүгін көңіліме көп нәрсе түйдім. Біз сарбаздардың парадқа дайындығын да қарадық. Біздің клуб та парадқа дайындық үстінде. Мұндай шара жастардың арасында жиі өткізілуі тиіс. Өйткені, жігіттердің барлығы да отан алдындағы әскери борышын өтеуге қазірден дайын болуы керек, – дейді З.Сейдуллаев.
«Болашақ бүгіннен басталады» акциясы мұнымен шектеліп қалған жоқ, оның шеңберінде Қостанай қаласының іргесіндегі Затобол кентіндегі стадионда үлкен шара өтті. Стадионда Қостанайдың «Тобыл» футбол командасы мен қызылордалық «Қайсар» кездескен болатын.
– Ұлы Отан соғысы ардагерлерін мәңгі есте ұстау керектігін стадионға жиналған жанкүйерлер мен спортшылардың есіне салғымыз келді. Өйткені, олар істеген ерлік ешқашан ұмытылуға тиіс емес, – дейді осы шараны ұйымдастырған балалар мен жастар ұйымдары қауымдастығының төрайымы Г.Қапенова.
Нәзира ЖӘРІМБЕТОВА,
Қостанай.