Бозжайнақ дүниенің бойына нәр жүгірткен, Наурыз мерекесі күндері дауысы көкте дамылдаған Димашымыз Мәскеудің Кремль сарайында ән салып алқалаған әлеуметтің айызын бір қандырып қайтқан еді. Енді міне, сол сахнада «Астана Опера» театрының балет труппасы билемек. Олар алдағы сәуір айында өтетін «Вацлав Нижинский. Орыс балетінің кемеңгері» атты ғаламат гала-концертке қатысуға шақырту алды. Айтулы өнерлерінің арқасында талай жерді аралаған астаналықтар онда жаһандық хореография жауһарларының бірі – әйгілі композитор Н.Римский-Корсаковтың музыкасына майталман хореограф М.Фокин қойған «Шехеразада» балетін апарады. Тасы өрге домалаған шығармашыл топтың жетекшісі, Ресей халық әртісі Алтынай Асылмұратованың айтуына қарағанда, бұл сапардың жөні бұрынғылардан бөлектеу көрінеді. Еуропа қалаларындағы гастрольдерін табысты аяқтаған талантты ұжым осы жолы да көрермен көңілін көншітерлік деңгейде өнер көрсетуді көздеп отыр.
Әрине, мәйекті мәдени шараның мән-маңызын арттырар шырайлы шығармалардың аз болмасы анық. Дәстүрлі би думанын ұйымдастырушы Ресейдің халық әртісі Андрис Лиепа іріктеген іліпаларлық қойылымдар қатарында «Ұйқыдағы ару», «Жизель», «Қасиетті көктем», «Петрушка», «Талисман» секілді балеттер бар. Дегенмен де керемет кештің сәнін біздің өнерпаздар кіргізетініне сенгіміз келеді. Өйткені бас-аяғы екі бөлімнен тұратын бағдарламаның тең жартысы қазақстандықтардың үлесіне тигелі тұр.
Талайды тамсандырар тамаша гала-концертке «Ковент-Гарден» Корольдік театрының премьері Вадим Мунтагиров, Санкт-Петербургтегі Мария театрының саңлағы Юлия Махалина, Ресейдің Үлкен театрының примасы Эленора Севенард секілді балет жұлдыздары қатысады. Бақ та, бап та сыналатын бәсекеде Бақтияр Адамжан, Анастасия Заклинская, Жәнібек Иманқұлов, Ильдар Шакирзянов және басқа елордалық жас дарындар жарқырап көрінеріне шек келтірмейміз.
Талғат БАТЫРХАН,
«Egemen Qazaqstan»