Жұма, 12 қазан 2012 7:01
«Жоғарғы Соттан бастап, бүкіл сот жүйесіне өздерінің жауапкершілігі мен біліктілігін арттыру, сөйтіп өз жұмысын жетілдіруді өздері бастау талабы қойылады», деп атап айтылған болатын Мемлекет басшысының Қазақстан халқына биылғы Жолдауында. Шын мәнісінде де судьялық этика нормаларын сақтау, сот процесінің ашықтығы мен жариялылығын қамтамасыз ету және судьяның кәсіби біліктілігі мен шеберлігін қалыптастырудың маңызы зор екендігі айтпаса да түсінікті. Бүгінгі күннің басты әрі өзекті талабына айналып отырған бұл мәселелер Алматы қалалық сотында өткен «Соттар және БАҚ» атты жиында кеңінен сөз болды.
Жұма, 12 қазан 2012 7:01
«Жоғарғы Соттан бастап, бүкіл сот жүйесіне өздерінің жауапкершілігі мен біліктілігін арттыру, сөйтіп өз жұмысын жетілдіруді өздері бастау талабы қойылады», деп атап айтылған болатын Мемлекет басшысының Қазақстан халқына биылғы Жолдауында. Шын мәнісінде де судьялық этика нормаларын сақтау, сот процесінің ашықтығы мен жариялылығын қамтамасыз ету және судьяның кәсіби біліктілігі мен шеберлігін қалыптастырудың маңызы зор екендігі айтпаса да түсінікті. Бүгінгі күннің басты әрі өзекті талабына айналып отырған бұл мәселелер Алматы қалалық сотында өткен «Соттар және БАҚ» атты жиында кеңінен сөз болды.
Алматы қалалық сотының төрағасы Мейрамбек Таймерденовтің пікірінше, «ақпарат алмасудың бүгінгідей жаңа әрі сапалы кезеңінде сот жүйесінде жариялылық пен ашықтық басты қажеттілікке айналуда». Сондықтан да Алматы қалалық соты келешекте осы бағытта бірқатар іс-шараларды жүзеге асырмақ. «Ұлан-байтақ Қазақстандағы ең ірі шаһар – Алматы тек инвесторлардың ғана емес, қылмысқа икемі барлардың, құқық бұзушылардың да назарын өзіне аударуда. Екі миллионға жуық тұрғыны бар қалада, өкінішке қарай ірі қылмыстар да орын алып отырғаны жасырын емес.Менің ойымша, көпшіліктің, қала тұрғындарының сот билігі, сот төрелігінің жүргізілуі бағытындағы жұмыстар жөнінде хабардар болуының қажеттілігі де, берері де мол екендігі сөзсіз. Соған орай, бүгінгі күні есігін айқара ашып отырған «Баспасөз орталығында» жүйелі түрде «Ашық есік күнін» ұйымдастыру жоспарланып отыр. Тұрақтылық сипат алатын мұндай кездесулердің мазмұнды өтетіндігіне сенім мол», деді Мейрамбек Таймерденов өз ойын ортаға салып.Адам тағдыры таразыға түсетін сот жұмысының күрделілігі мен жоғары жауапкершілігі және алдағы уақытта атқарылатын іс-шаралар туралы жиынға қатысушылар салмақты ойларымен бөлісті. Алматы қалалық соты қылмыстық істер жөніндегі апелляциялық сот алқасының төрағасы Лұқмат Мерекенов, судья Шолпан Құрманбекова және басқалар БАҚ өкілдерінің көптеген сауалдарына жауап берді. Сонымен, жалпылай алғанда еліміздегі сот билігіне көпшіліктің құрметін қалыптастырудың тиімді жолдары кәсіби іскерлікпен және іргелі ізденіспен келмек. Көп түйіні осы.Бақыт БАЛҒАРИНА,«Егемен Қазақстан».Алматы.