Жолдың жайы алаңдатады

– Ауыр салмақты жүктерді тасы­малдау қарқындылығы жол жа­мыл­ғысының бұзы­­луына, жолдың шөгуіне, ойылу­ына, пластикалық деформа­ция­­лардың пайда болуына және автомобиль жолының мерзімінен бұрын тозуына, тіпті түбегейлі бұзылуына әсер етеді, – деді «ҚазАвтоЖол» ҰК» АҚ Басқарма төрағасының орынбасары Арман Жүсіпов. Оның айтуынша, ауыр жүк таситын көліктердің басым көп­ші­лігі кеніштерден инертті материалдарды шамадан тыс артып алатын қытайлық көліктер екені анықталған. 

− Көліктік бақылау жүр­гі­зу кезінде көптеген тасы­малдау­шы­лар­дың тауар-көлік жүк құжаты болмай шығады. Мысалы, 2018 жылы 5 700 тасымалдаушы әкім­ші­лік жауапкершілікке тартылып, 188 млн теңге айыппұл салынды. Жауапкершіліктен қашу үшін жүк жөнелтушілер (кеніш иелері) инертті жүктер тиегенде тауар-көлік жүк құжатын көрсет­пейді. Қазір бақылауды 3 стацио­нарлық көлікті бақылау бекеті, 48 жылжымалы бекет жүзеге асырады. Бұдан бөлек жалпы пайдаланымдағы автомо­биль жолдарына 12 арнайы авто­маттандырылған өлшеу құрал­да­ры орнатылды. 2018 жылы 12 515 көлік құралы тексеріліп, 4384 заң бұзушылық анықталды. Оларға 321 млн теңге айыппұл са­лынды», – деді Индустрия және инфрақұрылымдық даму министр­лігі Көлік комитетінің төраға­сы Самат Гилимов.

«Қазжол ҒЗИ» АҚ президенті Бағдат Телтаевтың айтуынша, еліміз­дегі негізгі жолдар 10 тон­на­лық салмаққа жобаланған. «Республикалық және жалпы пайда­лануға берілген жергілікті жол­дардың саны шамамен 100 мың шақырым дейтін болсақ, сон­ың үштен екі бөлігі (67 пайызы) 10 тонна және одан да төмен бі­лік күшіне есептеліп салынған. Егер жолға осы нормадан артық күш түсетін болса, онда ерте бұзылуы ықтимал. Егер бір ғана білік 15 тонна жүкпен өтетін болса, онда бір ғана біліктің жолға түсіретін салмағы алты авто­көлікке тең. Елбасының тап­сырмасымен қаншама миллиард теңгені жолдың сапасын кө­теруге жұмсадық. Егер осы жол­дағы автокөліктердің білігіне түсе­тін күш нормаға сай екенін қадағаламасақ, алдағы уақытта қолданыстағы жолдардан айырылып қалуымыз мүмкін», – деді ол. 

Б.Телтаев сондай-ақ жақында ғана Қарағанды облысында асфальтқа батып қалған камаз­дар­дың жайына қатысты өткір сын айтып, бұл мәселеге қатысты шараларды заң аясында қатаңдату қажеттігін ескертті.

«ҚазАвтоЖол» ҰК» АҚ Бас­қар­ма төрағасының орынбасары А.Жүсіповтің айтуынша, биыл 1190 шақырым жолға орташа жөндеу жұмыстары жүргізіліп, пайдалануға беріледі. Оның 480 шақырымы ресайклинг технологиясы бойынша, 250-і жолдың кедір-бұдырлы бедерін өңдеу, 48 шақырымы микросюрфейсинг технологиясы бойынша, 412-сіне жолға цемент бетон жабындыны жаңарту және жасарту жұмыстары жүргізіледі деп жоспарлануда. Күтіп-ұстау жұмыстарымен 

22 мың шақырымнан астам автожол желісі қамтылады. Күрделі және орташа жөндеу жұмыстарына – 54,4 млрд теңге, ағымдағы жөндеу жұмыстары мен күтіп ұстауға – 26,1 млрд теңге бөлінген.