Алғашқы қазақ геологы, академик Сәтбаевтың өмір жолы, қайраткерлік қызметімен таныстыру мақсатында қордағы құжаттар, академиктің архивіндегі фотоқұжаттар, заттық деректер келушілер назарына ұсынылды. Бұл ашылып отырған көрме экспозициясы төрт тараудан тұрады. «Өмір жолын таңдау» айдарымен топтастырылған бірінші тарау ғалымның балалық шағынан сыр тарқатады. Қаныш Сәтбаев Жезқазған мыс және Байқоңыр көмір кені орнында алғашқы тұрақты барлау жұмысын ұйымдастырды. Ол бүкіл Жезқазған-Ұлытау ауданындағы пайдалы кен орындарының қорын жоспарлы түрде анықтау ісін жолға қойып, әлемдегі үш ірі мыс кені орнының бірі – Ұлытау-Жезқазған мыс кені көзін ашты.
Көрме экспозициясында көпшілік назарында ғалымның еңбектері, қайта басылған «Алгебра оқулығы», Мемлекеттік музей қорында сақталған жеке заттары ұсынылды.
Бүгінде әйгілі ғалым, ғылым саласының ұйымдастырушысы, білікті маман, өз халқының нағыз жанашыры, ұлтжанды Қаныш Имантайұлының есімі Қарағанды облысындағы Сәтбаев қаласына, бірқатар минералдар, мұздық, тау шыңдары мен гүлдерге берілді. Қ.И.Сәтбаев атындағы сыйлық және стипендиялар жарияланған. Көк жүзінде Сәтбаев жұлдызы да жарқырайды.
Сапарбай ПАРМАНҚҰЛ, «Еgemen Qazaqstan» АЛМАТЫ