Астықты өлкеде жыл сайын күзгі жиын-терін кезінде көш бастайтын ауданның диқан-механизаторлары биыл тәп-тәуір дайындық жасаған сыңайлы. Жұмыс ауқымы да аз емес. 459,3 мың гектар алқапқа бидай, дәнді және бұршақ дақылдары, майлы дақылдар себілмекші. Оның үстіне 472 гектар жерге картоп пен көкөніс отырғызу межеленген.
Негізінен жазық дала болғандықтан, көктемгі дала жұмыстарына дейін топырақтың кеуіп кететіні бар. Қыста қар тоқтатудың да мүмкіншілігі аз. Сондықтан, ендігісі ылғал жабу. 224,8 мың гектар жердің ылғалын жабу жоспарланса, оның 32,5 пайызы ғана жүзеге асырылыпты. Дәнді дақылдың негізгі шарты ылғал болатын болса, алқаптарды арамшөптен арылту, күні бұрын өңдеуден өткізу де аса маңызды. Бұл орайда диқандардың ниеті көңіл қуантады. Олар 140 мың гектардан астам алқапқа дән сіңірмес бұрын өңдеу жүргізбекші. Оның ішінде 90 мың гектардан астам алқап химиялық әдіспен өңделмек. Жақсының диқандары ылғал жинағыш технологияны да қолдануда. Биылғы егісте 308,4 гектар алқапқа осындай әдіс қолданылады.
Әр жыл сайын егіс алқаптарын тыңайтқышпен байыту да қолға алынған. Аудан диқандары 4,5 мың тонна аммофос, амиактық селитра, сульфоаммофос тыңайтқыштарын сатып алған.
Жыл сайын тұқымды жаңалап отыруға, сапасын жақсартуға көп көңіл бөлеміз. Көктемгі егіске қажетті 55,8 мың тонна тұқым зертханада сараптамадан өткізілді. Сапалы тұқыммен өзімізді ғана емес, көршілес аудан шаруашылықтарын да қамтуға қауқарымыз жетеді, – дейді аудан әкімінің орынбасары Рүстем Рамазанов, – қазір біздің шаруашылықтарда 15 тоннадан астам тұқым сатуға қойылған.
Бір жақсысы, машина-трактор паркі де ішінара жаңару үстінде екен. Өткен жылы 125 қуатты техника сатылып алыныпты. Көктемгі дала жұмыстарына қажетті әр литрі 183 теңгеден бағаланған 6110 тонна дизель отыны жеткізілген.
Жақсы ауылының іргесіндегі «Айбат» жауапкершілігі шектеулі серіктестігінде болғанымызда шаруашылық басшысы Асқар Жапаровпен тілдестік. Басшының айтуына қарағанда, өткен жылы серіктестік 26434 тонна астық жинаған екен. Агротехникалық шараларды уақтылы орындауының арқасында гектар берекесі 17,3 центнерден айналыпты. Бұл жақсы көрсеткіш. Серіктестік диқандары шетелдік ауыл шаруашылығы техникаларының кейбір ақауларын арнайы цехта жөндеу үстінде. Көктемгі дала жұмыстарын 19 мамырда бастап, он күннің ішінде аяқтап шығуды межелеп отыр.
Жақсының жалпақ даласын игілік алқабына айналдырған қажырлы жандар қауырт науқанға тыңғылықты дайындық жасаған екен. Көктен иіп, жерден берсе, ырыздық та мол болары сөзсіз.
Ақмола облысы,
Жақсы ауданы