Осы мәселелердің түйінін тарқату үшін өңір басшысы Өмірзақ Шөкеев жуырда киелі шаҺардың көпті көрген көнекөз қарияларымен кездесті. Түркістан облысының құрылғанына 1 жыл толуына орай ұйымдастырылған кездесуде қала тұрғындарын мазалаған мәселелер талқыланды. Өңір басшысы алдымен қала инфрақұрылымын дамыту, көгалдандыру мен тарихи орындарды абаттандыруға тоқталды.
Өмірзақ Шөкеев ақсақалдармен әңгіме барысында рухани астанаға оң өзгерістер қажет екенін айтты. Атап айтқанда, жаңа облыс орталығының тұрғын үй-коммуналдық және инфрақұрылым мәселелеріне, қаланың халықаралық туристік оазис ретінде қалыптасуына ерекше назар аударылады. Сондықтан облыс басшысы жергілікті билік органдарына қарапайым адамдармен тіл табысып бірлесе жұмыс атқаруды, жаңа Түркістандағы тұрғын үй алаптары маңын суару және көгалдандыру мәселелерін шешу үшін ақсақалдармен кеңесуді ұсынды.
Бүгінде көне шаһарда ақсақалдар алқасы жергілікті өзін өзі басқару мақсатында сегіз шаруашылықты ұршықша иіріп отыр. Әр ауданның өз учаскесі бар, ол учаскелердің иелігінде жеке тұрғын үйлер бар.
Қала халқына пайдасы тиетін, енді ғана жұмысын бастаған жүйеге қазіргі таңда қолдау қажет. Сол кезде ғана оның тиімділігі арта түспек. Өйткені кейбір аудандар мен учаскелер жақсы жұмыс істеп жатса, өзгелерінің жұмысы орта деңгейде. Сондықтан да әкімдік тарапынан жан-жақты көмек керек.
Облыс әкімі Өмірзақ Шөкеев түркістандықтардың аулаларына жасыл желек егіп, көшелерді қоқыстан тазарту жөніндегі бастамасын жоғары бағалады. Сондай-ақ өңір басшысы әкімдік тарапынан қала ішінде бірнеше арна мен арықтар қазылса, өңір тұрғындары қаланы көгалдандыруға атсалысса деген ұсынысын білдірді.
Киелі қаланы көгалдандыру керек
Өмірзақ Шөкеевтің Түркістанды суландыру жөніндегі ауқымды жобасы ең алдымен қаланың микроклиматын өзгертпек. Киелі қалада ағын су көп болса жасыл желек пен күн ыстықта қорған болар ағаштар да көп өседі. Құстар мен әдемі гүлдер де қаланың көркін ашады.
Бүгінде Түркістанда Тұңғыш Президент саябағы, қалалық ойын-сауық саябағы, Арбат салынуда. Бұл саябақтардың жалпы ауданы 100 гектарға жетеді. Қаланың көгалдануы рухани астананың, қала маңының жаңа микроклиматын қалыптастыруға, құстардың көбеюіне сеп болуға тиіс.
Бұдан басқа, ежелгі қаланың экологиялық жағдайын жақсарту үшін Бас жоспардың жобасын ескере отырып, Түркістанның айналасындағы 7 мың 700 гектар аумаққа жасыл белдеу отырғызылуда.
Бүгінгі таңда 90 мыңнан астам түрлі ағаш отырғызылып, 300 гектар аумақта тәлімбақ құрылса, жыл соңына дейін Түркістан аумағын 1,5 мың гектарға көгалдандыру жоспарланып отыр.
Сондай-ақ облыстың аудан-қалаларында 2019 жылдан 2021 жылға дейін 2991,5 гектар жер абаттандырылады. Мысалы, ағымдағы жылдың көктемінде аудан орталықтарында және Түркістан қаласында жалпы ауданы 703 гектарға 395 мың көшет отырғызылды. Жыл соңына дейін 1028 гектар аумақта тағы 470 мың ағаш отырғызу жоспарланып отыр.
Жыл басынан Түркістан қаласына кіреберісте жол бойында 18 мыңнан астам павлония, боз арша, терек және сириялық раушан бұталары отырғызылды.
«Асар» тәжірибесін қайталау
Өмірзақ Шөкеев өңір ақсақалдарына уәде еткендей, облыс әкімдігі қаланы сумен қамтамасыз етумен қатар, түрлі өсімдіктердің көшеттерін де сыйға тартатын болды. Сонымен қатар кәсіби тұрғыда қызығушылық танытқан барлық жергілікті тұрғындарды көгалдандыру өнеріне тегін оқыту басталады. Қазір арнайы анықтамалықтар дайындалып, оқулықтар шығарылған.
Тұрғындардың өмір сапасын жақсарту және Түркістанның жаңа микроклиматын қалыптастыруға ынталандыру мақсатында облыс әкімі қаланы таза ұстап, көгалдандыруда өзгелерге үлгі болған тұрғындар мен аудандарға арнайы сыйақы тағайындайтынына кепілдік берді.
Осы ізгі істі облыс басшысы өңірдің өзге аймағына үлгі ретінде көбейтуді жоспарлап отыр.
Сонымен қатар түркістандық ақсақалдардың бастамасымен облыс орталығында «тұрмысы төмен жандарға арналған дүкен» өз жұмысын бастаған. Аталған дүкен қайырымды жандардың арқасында мұқтаж тұрғындарды азық-түлік, киім-кешекпен қамтамасыз етуде. Жақында ашылған дүкен тұрмысы төмен 300 отбасына қызмет көрсетуде.
Айта кету керек, қала тұрғындары осындай кездесулердің жиі өтіп, өздерінің жоспарлары мен ұсыныстарын өңір басшысымен бөлісе алатын мүмкіндікті қолдайды. Сондай-ақ олар облыс көлемінде жүріп жатқан оң өзгерістерге ризашылықтарын білдірді.
ТҮРКІСТАН