Бұл күндері АҚШ-тың Ньюпорт қаласында өтіп жатқан теннистен ATP санатындағы турнирді қазақстандық теннисші Александр Бублик сәтті бастады.
Рейтингте 83-орында тұрған отандасымыз А.Бублик алғашқы айналымда әлемнің 150-ракеткасы, аустралиялық Алекс Болтпен шеберлік байқасты. АҚШ-тағы турнирдің 7-ракеткасы болып тіркелген қазақстандық теннисші үш сетке созылған бәсекеде 6:4, 2:6, 7:6 есебімен жеңіске жетті. Тартысты матч екі сағатқа созылды.
Көгал төсенішінде өтіп жатқан доданың екінші айналымында А.Бублик рейтингте 167-орында тұрған сербиялық Виктор Троицкимен кездеседі. Ньюпорт турнирі 21 шілдеде аяқталады.