Тамыз айы елорда тұрғындары үшін таңғажайып карнавал шеруімен есте қалмақ. HPAIR Asia Conference-2019 халықаралық конференциясы ұйымдастырушыларының ұйытқы болуымен бас шаһар төрінде I Carnival дәстүрлі мәдениет карнавалы және әлемнің 40-тан астам елінің өкілдері қатысатын I Night кеші өтеді.
16-20 тамыз аралығында дүние жүзінің жас көшбасшылары Қазақстан астанасына әлемнің ең ауқымды студенттік жобаларының бірі – HPAIR Asia Conference-2019 шарасына қатысу үшін жиналады. Конференция ұйымдастырушылары делегаттар мен бас шаһар халқын естен кетпес әсерге бөлеу үшін де жоба бағдарламасын түрлі мәдени бастамалармен байытыпты. Соның бірі – I Carnival мәдениет және дәстүр карнавалы. Халықаралық жәрмеңке форматында өтетін өнер оқиғасы қала тұрғындары мен қонақтарына конференция делегаттары ұсынар дәстүрлі тағамдардың дәмін татып, ұлттық кәдесыйлар сатып алуына тамаша мүмкіндік береді. Ал айтулы жоба аясында өтетін I Night халықаралық мәдениет мерекесінде түрлі елден келген қатысушылар өз халқының ұлттық музыка, театр және би өнерінен шашу шашады.
– I Night және I Carnival жобасы – әлемнің түрлі халық өкілдері арасындағы рухани достық пен ынтымақтастықты нығайтуға ықпал ететін бірегей мәдени оқиғалардың санатында. Осы орайда біз өз тарапымыздан Kazakhstan Night жеке іс-шарасын дайындап жатырмыз. Онда шеттен келген қонақтарға қазақ музыкасының жауһарларын, атап айтсақ домбыра мен қобыздың ежелгі күйлерінен бастап, Q-pop заманауи мәдениетіне дейінгі ғасырлар бойғы эволюциясын көрсеткіміз келеді. Әлемнің түкпір-түкпірінен жиналған конференция қатысушылары – құрметті меймандарымыздың елордамыз, жалпы Қазақстан туралы ұмытылмас әсер алғанын қалаймыз, – дейді HPAIR Asia Conference-2019 ұйымдастыру комитетінің төрағасы, Назарбаев Университеттің студенті Ләйлә Ахметова.
Естеріңізге сала кетейік, HPAIR Asia Conference-2019 конференциясын Назарбаев Университетпен ынтымақтастықта Азия және халықаралық қатынастар бойынша Гарвард университеті (HPAIR: Harvard College Project for Asian and International Relations) бірлесіп ұйымдастырады. Өзінің 28 жылдық тарихында HPAIR Asia Conference Орталық Азия аумағында алғаш рет өткелі отыр. Конференцияның күн тәртібі алты тақырыптық бағытты және ауқымды мәдени бағдарламаны қамтиды.