Аз уақыттың ішінде жаңа кәсіп игеріп, тіпті жеке бизнес ашу оңай ма? «Isker ana» жобасына қатысушылар бұл сауалға «Әрине» деп жауап береді. Биыл облыс әкімі Нұрлан Ноғаевтың бастамасымен осындай жоба жүзеге асты. Жұмыссыз, көп балалы, жалғызбасты, мүмкіндігі шектеулі бала тәрбиелеп отырған, аз қамтылған отбасылардағы әйелдер арасында белсенді сұранысқа ие болған жобаға қатысушылардың саны 600-ден асқан. Оның 280-і аудан тұрғындары.
«Isker ana» әлеуметтік білім беру жобасы аясында әйелдер тігін ісі, аспаз, шаштараз, визаж, есепші, ағылшын тілі, компьютерлік сауаттылық секілді 10 түрлі мамандық бойынша оқып, сертификат алды. Курс барысында түрлі тренингтер өткізіліп, қатысушылар әлеуметтік желілерді мақсатты пайдалану, жарнама орналастыру, онлайн-сауда жүргізу машықтарын меңгеріп, бизнес жүргізу негіздерін оқыды. Өңір басшысы жоба басталар алдында курс бітірушілердің бизнес-жобаларын қарастырып, өз істерін дамытуға қажет құрал-жабдықтарды сатып алуға көмек көрсетілетінін айтқан болатын. Осы бағытта «Isker ana» жобасының І грант байқауы ұйымдастырылды.
– Жоба аясында арнайы білім алған әйел адамдардың арасынан кәсіп бастауға ниет білдіргені, бизнес-жоспар жасағандары грант байқауына қатысты, – дейді облыстық ішкі саясат басқармасының басшысы Жасұлан Бисембиев. – Нәтижесінде облыс бойынша 110 әйел адам грантқа ие болды. Оларға өз істерін бастаулары үшін қажет құрал-жабдықтар берілді.
«Isker ana»-ның бірі – Индер ауданының тұрғыны Айдана Темірғалиева. Жалғызбасты ана бұған дейін мемлекеттен алатын жәрдемақымен ғана күнелтіп келген. Енді жаңа кәсіп меңгеріп, ауылында шағын бизнес бастайды. «Осындай мүмкіндік сыйлаған аймақ басшысына ризашылығым шексіз. Тегін курсқа қатысып, достар таптым, білім көкжиегімді кеңіттім, көп нәрсе үйрендім. Енді оқығандарымды іс жүзінде көрсету – мақсатым», дейді.
Үй шаруасында отырған аналарды кәсіпке оқыту ұтымды шешім болғанын «Isker ana» жобасына қатысушылардың болашаққа деген сенімдерінен де аңғаруға болады. Ал сенім – ұлы күш.
АТЫРАУ