«Алматылықтар үшін маңызды жерде жаяу жүргіншілер жолы экологиялық талапқа сай оңтайландырылып, жарықтандырудың инженерлік желілері мен суару жүйесі салынады. Сондай-ақ үш кіру аймағы болады. Жаңартылған Ботаника бағы өзінің ғылыми-зерттеу және табиғатты қорғау қызметін жалғастыра отырып, қаланың ерекше көрікті жеріне және мегаполис тұрғындарының демалыс аймағы болып қала береді. Қайта жөндеу жүргізудің басты мақсаты – экологиялық тепе-теңдікті құру арқылы бақшаның табиғи ортасын сақтау», – деді Алматы қаласының әкімі Бақытжан Сағынтаев.
Одан бөлек, шаһар басшысы бұрынғы Саяси ағарту үйін қайта жөндеуден өткізіп, Достық пен Абай даңғылының, Пушкин мен Құрманғазы көшелерінің шаршысын да қайта жаңғырту керектігіне назар аударды. Мердігерлердің назарына аталған тарихи ғимараттың сәулеттік келбетін қалпына келтіру қажеттігін ескертті.
«Бұл – Алматының тарихи және мәдени орталығы. Ескі Алматының қайталанбас келбеті сақталуы тиіс», – деді әкім өз сөзінде.
Әр уақыттың өз ерекшелігі болады. Ол кезде «Түрі ұлттық, мазмұны социалистік» деген қағида барлық салада үстемдік етті.
Бірақ сол заманның белгісі деп танылған ғимараттарды тарихи ескерткіш ретінде сақтап қалу туралы Үкіметтің шешімі бар. Қазір тарихи ескерткіштердің республикалық және Алматы қаласы деңгейіндегі екі тізімі бар. Тарихи ескерткіш болып табылатын ғимарат, ол кімнің меншігінде болса да, Үкіметтің қорғауында тұр.
Оны бұзып, түрін өзгертуге ешкімнің құқы жоқ.