Катардың бас шаһары – Дохада жеңіл атлетттердің әлем чемпионаты аяқталды. 10 күнге созылған бәсекелер барысында 49 жүлде жиынтығы сарапқа салынды.
Айтулы додада 27 жүлде жеңіп алған АҚШ құрамасы командалық есепте айқын жеңіске қол жеткізді. Тарқатып айтсақ, америкалықтар 12 алтын, 11 күміс және 4 қола медальді қоржынға салды. Желмен жарысқан желаяқтарына арқа сүйеген Кения мен Ямайка екінші және үшінші орындарды олжалады. Қара құрлық өкілдері 11 (5+2+4) жүлде алса, аралықтар 10 (3+4+3) мәрте жеңіс тұғырынан қол бұлғады. Үздік бестіктің қатарына Қытай (3+3+3) мен Эфиопия (2+5+1) қосылды.
Допинг дауына байланысты Ресей спортшылары өз елінің туы астында емес, «бейтарап атлеттер» командасы сапында өнер көрсетті. Дохадағы додада олар алты медальді (2+3+1) иеленіп, жалпы есепте алтыншы сатыға табан тіреді. Бұл жарыста барлығы 44 мемлекеттің өкілдеріне жүлделі орындар бұйырды.
Өкіншіке қарай, осы жарыста Қазақстанның жеңіл атлеттеріне бірде-бір жүлде бұйырған жоқ.