Елімізде «Қамқоршылар күні» жыл сайын қазан айының 29-ында атап өтіледі. Мақсат – қамқоршылар мен қорғаншыларды қолдап, патронаттыққа алынған бүлдіршіндерді, жетім және ата-ана қамқорлығынсыз қалған балаларды отбасы үлгісінде тәрбиелеуді насихаттау.
Ал аудан орталығы Көктөбе ауылының Жалтыр орта мектебінде өткен «Мейірімді жүрек» мерекелік шарасы аудандағы жетім және ата-ананың қамқорлығынсыз қалған балаларға және олардың қамқоршылары мен қорғаншыларына арналды. Шақырылғандардың барлығына да «Мейірімді жүрек» төсбелгісі тағылды. Айтса айтқандай-ақ, мейірімді ізгі жандардың көбеюінен елімізде қазір балалар үйлері жабылып, жетім балалар саны азайып келе жатқаны белгілі. Жалтыр мектебінде өткен шараға келгендердің бірі – қамқоршы Райхан Тілеукина болса, ол өзінің бауырының балалары Рината мен Амиранды тәрбиелеуде.
– Бауырыма басқан осы екі баланы «Балалар үйіне» өткізбейін деп өз қамқорлығыма алдым. Балалар үйінде балалар саны азайса, аман-есен жеткізсем, осы аманатымды орындасам деймін, – дейді Райхан апай.
Көктөбе ауылында тұратын Қуаныш Көшербайұлы Төлеу Әрсеннің, Людмила Жұмаділова Бауыржан Жұмаділовтың, Любовь Шиябутдинова Алина Серікбаеваның, Гүлжан Қадырбекқызы Данельдің қорғаншысы және Ратмир, Тамир, Лиана Мингазутдиновтардың қамқоршысы, Динара Доғалақова Мейрамгүл мен Айшагүл Доғалакованы, Күлпан Иманшарипова Оналқан Қазбекті, Раиса Аязбаева Ділмұхамед Аязбаевтарды тәрбиелеуде.
Әрқайсысы әртүрлі тағдырлы балаларды бауырларына басып, мейірімді жүрек, аялы алақан жылылығын сыйлауда. Барлығы да қамқорлығына алған ұл-қыздарды балалар үйіне бермей, өз балаларымен бірдей көріп, бағып-қағып өсіруге аманат арқалаған жандар.
– Балаларды балалар үйіне жібере алмаймын. Өсіріп, жеткізем. Бәріміз бір қазаннан ас ішеміз. Бір қазан ас бәрімізге де жетеді, – дейді Саты ауылының тұрғыны Құралай апай.
Мейірімді жандардың қатары аз емес, мысалы, Қаратерек ауылының тұрғыны Сәбира апай Атанбай Алдиярға, Қайынжамал апай Саида Мұқтарова мен Арнат Көпежановқа қамқоршы болып тағайындалған. Малайсары ауылының тұрғыны Қайырбек ағамыз Әлішер Қазбековты өз қамқоршылығына алған азамат екен. Ал Құралай Рысбекова Зарина, Азат Социалдардың қамқоршысы.
Сонымен қатар Май ауылының тұрғыны Балтабай Қуат Данара Балтабайдың қамқоршысы, Баскөл ауылының тұрғыны Назым Сейфуллақызы Әлинұр Надырбаевтың патронаттық тәрбиешісі. Майтүбек ауылының тұрғыны Владимир Белоус Руслан Түстікбев, Александр Плаксенконың қамқоршысы, Алмагүл апай Риза Қазбекованың қорғаншысы.
Иә, жетімдерге жан жылуын сыйлаған осындай қамқор жандар ортасында отырып, әңгімелерін тыңдағанда көзге жас келеді. Қамқорлығына алған балаларына деген үлкен жауапкершілікті, жылылықты, мейірімді бауырмалдықты байқайсыз.
Қорғаншылар мен қамқоршылар балаларға өздерінің туған әке-шешесіндей бола алмас. Бірақ тағдырдың қатал сынына ұшырап, отбасынан ажырап қалған балаларға қамқорлық көрсетіп, бауырына басатын жандардың арамызда болғаны көңілге демеу.
– Бүгінгі шара әлеуметтік жетімдіктің алдын алу негізінде ұйымдастырылған. Мақсаты – жетім және ата-анасының қамқорлығынсыз қалған балаларға отбасылық жылуды және қамқорлықты сезіндіру. Ата-анасының қамқорлығынсыз қалған және көмекке мұқтаж балалар үшін елімізде арнайы қорғаншылық және қамқорлық органдары жұмыс істейді. Осындай балаларды іздеп, тауып, оларды орналастырып, тұрмыс жағдайларын бақылау міндеттерін жүзеге асыру бізге жүктелген, – дейді аудандық білім бөлімінің басшысы Орынбасар Темірболатова.
Ауданда қамқоршыларды бір-бірімен таныстыру, кездескен қиындықтарды шешу жолдары жəне өзара тəжірибе алмасу және психологиялық қолдау мақсатында арнайы тренингтер өткізіледі.
– Мақсат – ата-анасынан айырылған балаларға қамқор болып отырған қамқоршыларға ілтипат білдіру. Басқа ата-аналарға оларды үлгі-өнеге ретінде насихаттап, жүрек жылуын ояту. Бала тәрбиесі – баршаға ортақ іс. Сондықтан ауданда ауылдық аумақтағы ақсақалдар, әйелдер кеңесі, жастар қанаты бірлесе жұмыс істеуде, – деді іс-шараға қатысқан аудан әкімі Марат Ақтанов.
Іс-шараға келушілер арасында Людмила Архиповна Ирина Ёлкинаның, Асият Кеңесқызы Максим, Алексей Перстнёвтердің, Денис Ковалев Андрей Ковалевтің, Юлиананың, Әсел Қасыбаева Төлеу Серіктің, Әсия Асхатқызы Нұрсултан Қайдаровтың, Любовь Волобуева Юлия, Алина Калиниченколардың қамқоршылары болды.
– Жалпы, ауданда жетім және ата-ананың қамқорлығынан қалған балалардың саны – 33, ал қамқоршылардың және қорғаншылардың саны – 22 адам. Қазір жетімдерді қамқорлықтарына алған отбасылар қатары көбейіп келеді. Аудандық білім бөлімінің қолдауымен «Қамқоршы күнінде» жетім және ата-ана қамқорлығынсыз қалған балаларды бауырына басқан жүректері мейірімге толы, ізгі жандарға құрмет көрсеткіміз келді, – дейді аудан әкімінің әлеуметтік мәселелер жөніндегі орынбасары Мәдина Құсайынова.
Іс-шара аясында жетім балаларға жан жылуын сыйлаған қамқор жандарға аудан әкімдігі тарапынан сый-сыяпат жасалып, құрмет көрсетілді. Әлбетте қорғаншылар мен қамқоршылар өз міндеттеріне ақша талап етпейді. Сондықтан қабылдаушы отбасында баланың сәтті бейімделуі, отбасы тәрбиесіне алынған балаға деген сүйіспеншілігі, шыдамдылығы және еңбегі үшін қамқоршылар мен қорғаншыларға алғыс айтылды.
Пайғамбарымыз жетімнің басынан сипағанға оның қанша тал шашы болса, сонша сауаптан жазылатынын айтқан. Бұл ізгілікті сауап ата-ана мейірімінсіз өсіп келе жатқан балаларды бауырына басқан жандарға арналғандай.
Павлодар облысы,
Май ауданы