Жанкелдин ауданындағы төрт түлік мал өргізген Аралбай ауылында «Болашаққа бағдар: рухани жаңғыру» бағдарламасы шеңберіндегі «Туған жерге тағзым» акциясы аясында Ұлы Жеңістің 75 жылдық мерейтойы қарсаңында Ұлы Отан соғысының ардагерлеріне, осы сұрапыл соғыстан оралмаған боздақтарға, қуғын-сүргін құрбандарына, 1928 – 1932 жылдары ашаршылықта қаза тапқан жерлестер рухына арнап, «Мәңгілік алау» ескерткіш-белгісі орнатылды.
– Торғайлықтар ел мен жердің тарихына өте сергек қарайды. Себебі аталарымыз осы жерде аштықтан қырылды, қуғынды да көрді, ал талай боздақ соғыстан қайтпай, шаңырағы ортасына түсті. Бұл ескерткіш-белгі ауылдастардың елжандылығымен, перзенттік парызды жоғары сезінуімен пайда болды. Бірліктің арқасы, – дейді ауыл әкімі Қойшыбек Молдабеков. Қазір қай жерде қандай да ірілі-уақты іс қаржысыз жүзеге аспайды. Ескерткіштің ашылу салтанатында аудан әкімі Шота Оспанов осы іске демеушілік көрсеткен Төретай Әлмамбетов, Әліби Бекқали, Елжан Хамзин, Құлахмет Шайхыстанов, Мұхит Тұрғынбекұлы секілді кәсібін дөңгелеткен ауылдастардың қолын қысып, рахметін айтты.
Шалғайда жатқан Аралбай секілді ауылдарда адамдардың іскерлігімен қатар айналасын ұйытатын белсенділігі, бірлігі ғана туған жерді тозудан сақтайды, көркейтеді. Аралбайлық Балғабай Қабжанов, Байғара Тоқсанбеков, Серік Мұстафин, Сапар Қозыкин, Хамит Аңсағаев секілді азаматтардың бастамалары, игілікті істері ауылды рухани тербетіп отырады. Жейтін асы мен киер киіміне тарықпаумен қатар, көңілге шуақ төгер қызықты ортасы бар ауылдан ешкім де көшкісі жоқ. Шағын футбол алаңын да бірінші салған осы ауыл. Қазыбай әулие мазарына құрылыс жұмыстарын жүргізіп, зиярат етуге келгендер үшін басына үй салды. «Костычев» ЖШС-нің директоры Балғабай Қабжановтың демеушілігімен Жангелдин орта мектебінде ІТ сыныбы ашылды.
Аралбайдағы аштық пен соғыс құрбандарына арнап тұрғызылған ескерткіш белгінің өзі ауылдан жүрекке жылы тиер леп ескендей әсер берді.
Қостанай облысы,
Жанкелдин ауданы,
Аралбай ауылы