Бұрнағы күні Шығыс Қазақстан облысында бұршақ аралас нөсер жауып, құйын ойнады. Бұл туралы Altaynews.kz тілшісі хабарлады.
Жексенбінің таңы Өскеменде тамылжып атты. Ауа райының кілт өзгеріп, бүлініп кететін нышаны байқалған жоқ. Кенет түске қарай бірден жер-дүние аламан тасырға айналып сала берді. Алдымен желкілдетіп дауыл тұрды. Оның екпінінен ағаштар майысып, жермен-жексен бола жаздады. Артынша шелектеп құйған жаңбыр сәлден кейін көше бойларымен жүгіре ақты. Жөңкілген су лезде табанжолдарды толтырып, көшенің ортасына шығып кетті. Осы шамада қаланың кейбір мүйістерінде бұршақ жауа бастады.
Көргендердің айтуларынша, облыстағы ең бір төтенше жағдай сол кездері Өскемен-Семей тас жолының бойында орын алыпты. Ал Украинка деп аталатын селоның аумағында нағыз дауыл тұрған. Міне, осы көріністерді Ерсұлтан Құсайынов деген азамат камераға түсіріп алып, ютубқа салыпты. Біз төменде соны назарларыңызға ұсынып отырмыз.
Сұлтан Бозайғыр.
{youtube}ZBfS3zV-ACY{/youtube}