Орталық коммуникациялар қызметінің баспасөз алаңында ҚР Индустрия және инфрақұрылымдық даму вице-министрі Берік Камалиев жұртшылықты Алматы қаласы әуежайының маңында жолаушылар ұшағының апатқа ұшырауына байланысты Bek Air авиакомпаниясының қызметін тоқтату мәселесі бойынша қабылданған шаралар туралы хабардар етті.
Баспасөз іс-шарасына спикерлер ретінде Питер Гриффитс-Қазақстан авиациялық әкімшілігі АҚ Бас директоры, «SCAT авиакомпаниясы» АҚ дамыту жөніндегі вице-президенті Дәулет Хамзин, Qazaq Air қаржы директоры Әділбек Өмірәлиев, Air Astana АҚ кірістерді басқару жөніндегі директоры Ерболат Байсалықов қатысты.
Bek Air әуе компаниясы ұшырылымдарының уақытша тоқтатылуына байланысты 2019 жылғы 27-31 желтоқсан күндері аралығына жоспарланған әуе компаниясының Нұр-сұлтан-Қызылорда, Қызылорда - Нұр-Сұлтан, Нұр-Сұлтан - Атырау, Атырау - Шымкент, Шымкент - Нұр-Сұлтан, Нұр-Сұлтан - Алматы, Алматы - Орал, Орал - Алматы, Алматы - Ақтау, Ақтау - Алматы, Алматы - Павлодар, Павлодар - Алматы, Ақтау - Шымкент, Атырау - Алматы, Нұр-Сұлтан - Шымкент, Алматы - Нұр-Сұлтан, Шымкент - Атырау, Атырау - Нұр-Сұлтан, Нұр-Сұлтан - Алматы, Шымкент - Ақтау бағыттары бойынша 100-ге жуық рейсі орындалмайды. Бұл бағыттарға барлығы 9157 билет (8180 ересек, 765 бала, 212 нәресте) сатылған.
Қазіргі уақытта әуе компаниясы 2019 жылғы 31 желтоқсанға дейін жоспарланған барлық рейстерге билеттердің толық құнын қайтарып жатыр.
2020 жылғы қаңтардың 3-10 аралығына (2020 жылғы 1-2 қаңтарға рейстер алдын ала жоспарланбаған) Bek Air әуе компаниясының рейстеріне 9785 (8307 ересек, 1153 бала, 325 нәресте) билет сатылған.
Осыған орай ұшырылмайтын рейстердің жолаушыларына өзге әуе компаниялардың қызметін пайдалануға, сондай-ақ басқа көлік түрлерін қарастыруға кеңес беріледі.
Отандық әуе компанияларының мәліметінше, Bek Air әуе компаниясының рейстері орындалмайтынына байланысты билеттердің құны көтерілген жоқ. Тиісінше, болған апатқа орай әуе билеттері бағасының шарықтап кеткені жөніндегі ақпарат шындыққа жанаспайды. Өйткені, Жаңа жыл қарсаңында және демалыс күндері билеттердің құны басқа күндерге қарағанда бұрыннан қымбатырақ болады. Жалпы билетті өз бағасына алу үшін делдалдардың қызметіне жүгінбей, әуе компанияларының ресми сайттарынан және аккредиттелген сату нүктелерінен алуға кеңес беріледі.
Air Astana және Qazaq Air әуе компанияларының мәліметінше, тоқтатылған рейстердің жолаушылары 2019 жылғы 31 желтоқсанға дейін сәйкес бағыттарға бос орындар болған жағдайда Bek Air әуе компаниясының рейстеріне алынған билет құнымен тасымалданады. Ол үшін билеттерді тікелей Air Astana және Qazaq Air әуе компанияларының кассаларынан алу керек. SCAT әуе компаниясы көрсетілген мерзімге дейін бос орындар болған жағдайда Bek Air әуе компаниясы жолаушыларын қабылдайды. Оған Bek Air әуе компаниясының өкілі ұсынған жолаушылардың мәліметтері көрсетілген табыстау тізімдемесі негіз бола алады.
Сонымен қатар, Air Astana 2019 жылғы 28 желтоқсанға Нұр-Сұлтан мен Алматы қалалары арасында қосымша рейстер ашты. Олар жергілікті уақытпен сағат 05:00-де және 10:00-де ұшады. Апаттан зардап шеккендердің жақын туыстары тегін тасымалданады. Оған қоса, жаңажылдық мерекелер мен демалыс кезеңінде Air Astana әуе компаниясы Алматыдан Нұр-Сұлтан, Ақтөбе, Ақтау және Атырау қалаларына қосымша рейстер ашады.
Колл-орталықтардың телефондары:
- «Қазақстанның авициялық әкімшіліг» АҚ +77172613187;
- «Air Astana» әуе компаниясы +77172584477, +77272444477, +77027024477;
- «SCAT» әуе компаниясы +77252998880 (ішкі 277, 278);
- «Qazaq Air» әуе компаниясы +77273561414;
- «Bek Air» әуе компаниясы +77273545000, +77017334576.