Елордада Премьер-Министрдің орынбасары Бердібек Сапарбаев үкіметтік емес ұйым өкілдерімен кездесті. Іс-шара Мемлекет басшысы Қасым-Жомарт Тоқаевтың «Сындарлы қоғамдық диалог – Қазақстанның тұрақтылығы мен өркендеуінің негізі» атты халыққа Жолдауында айтылған тапсырмаларды ілгерілету мақсатында ұйымдастырылды.
Сонымен қатар кездесуге Ақпарат және қоғамдық даму министрі Дәурен Абаев, Мәжіліс депутаттары, еліміздегі алдыңғы қатарлы үкіметтік емес ұйымдардың басшылары қатысты.
Іс-шарада сөз сөйлеген Премьер-Министрдің орынбасары Б.Сапарбаев қоғамның әр мүшесі мемлекеттің дамуына жауапты екенін айта келе, үкіметтік емес ұйымдар мен мемлекеттің қарым-қатынасына тоқталды.
«Үкіметтің негізгі мақсаттарының бірі – үкіметтік емес ұйымдардың жұмысын жетілдіріп, қоғамның әл-ауқатын арттыру. Елбасы Нұрсұлтан Назарбаевтың, Мемлекет басшысы Қасым-Жомарт Тоқаевтың тапсырмаларына сәйкес, Үкімет осы бағытта ауқымды шаралар атқарып келеді», деді Б.Сапарбаев. Сондай-ақ Премьер-Министрдің орынбасары ҮЕҰ өкілдерімен кездесу халықтың мұң-мұқтажын тыңдауға мүмкіндік беретінін атап өтті. Осылайша, аталған мәселелерді ұтымды шешуге жол ашылады.
«Бәріміз де осы мемлекеттің дамуына, болашағына жауаптымыз. Кемшіліктер болса оған да жауап беретін – біз. Өйткені бәріміз де қоғамның мүшесіміз. Үкіметтің мақсаты – үкіметтік емес ұйымдармен, қоғаммен жұмыс істеу. Үкіметтік емес ұйымдар халықты толғандыратын мәселелерді біледі. Соны бізге жеткізіп, мәселелердің шешілуі жолында біріге жұмыс істеуіміз керек. Үкімет ҮЕҰ-мен бірге жұмыс істеуге әрдайым дайын. Бүгінге дейін көптеген жұмыс атқарылды. Мемлекет тарапынан көрсетілген қолдау аз емес. Әрине кей бағыттар әлі де жетілдіруді талап етеді. Алайда, осындай кездесулердің, үкіметтік емес ұйым өкілдері айтқан ұсыныстардың маңызы ерекше», деді Б.Сапарбаев.
Іс-шарада Ұлттық сенім кеңесінің мүшелерін сайлау, оған үкіметтік емес ұйым өкілдерін қосу мәселесі де көтерілген. Б.Сапарбаев мұндай ұсынысқа қарсы емес екенін ескертіп, Кеңеске үкіметтік емес ұйым мүшелерін енгізуді қолдайтынын жеткізді.
«Халықтың шешілмей жатқан мәселелерін қоғамдық ұйымдар арқылы біліп, оңтайлы шешілуін қадағалау керек. Бір сөзбен айтқанда, үкіметтік емес ұйымдармен бірге атқарар шаруамыз аз емес. Диалог жасайтын алаңдар құрылып, қомақты қаражат бөлініп келеді. Қоғамдық ұйымдар арқылы атқарылып жатқан шаруа елге жетуі керек. Халықтың шешілмей жатқан мәселелері қоғамдық ұйымдар арқылы айтылып, шешімін табуы тиіс», деді Премьер-Министрдің орынбасары.
Жиынға қатысқан үкіметтік емес ұйым өкілдері елімізде жастар арасында суицидтың көбейіп кеткеніне алаңдаушылық білдірген. Б.Сапарбаев бұл түйткілді шешуге қоғам болып жұмылу қажет екеніне тоқталды.
«Бұған бәріміз кінәліміз. Өйткені олар біздің балаларымыз. Кінәні үкіметке ғана арту дұрыс емес. Олардың ата-аналары қайда қарап отыр? Әрине биліктің кемшілігі бар. Кей сәтті ескермей қалуы, кей салаға қаржы аз бөлінуі мүмкін. Жасөспірімдердің бос уақытын тиімді пайдалануға бағытталған спорттық шаралар жеткіліксіз болуы ықтимал. Алайда, ата-ананың жауапкершілігін де ұмытпаған абзал. Сондықтан «Педагог мәртебесі туралы» заңда ата-ананың жауапкершілігіне ерекше назар аударып отырмыз. Бұл түйткілмен бірлесіп күресуіміз керек», деді Б.Сапарбаев.
Бұдан бөлек, жиын барысында азаматтық қоғамды дамыту, сенім мәдениетін қалыптастыру, мемлекет пен азаматтық қоғам институттарының қарым-қатынасы, әлеуметтік кәсіпкерлік секілді қоғамдағы маңызды мәселелер талқыланды.