Қостанай облысында өз әйел, бала-шағасын өлтірмек болған қаскөйдің қолынан полиция қызметкері қаза тапты. Қаңтардың 19-ына қараған түні ащы суға сылқия тойып алған 28 жастағы Тобыл қаласының тұрғыны өз үйінде жанжал шығарып, отбасы мүшелерін пышақтап тастамақшы болады. Пышақ алып шығу үшін үйіне кіргенде, туыстары оны сыртынан құлыптап, полиция шақырған. Құрамында Дархан Базарбаев пен Амангелді Сыздықов бар патруль жасағы оқиға орнына 6 минут ішінде жетеді.
– Үй иесін ұстау, қауіпсіздендіру кезінде полиция сержанты Дархан Базарбаев пышақ жарақатын алады. Қаскүнемнің суық қаруын тартып алып, қолына кісен салып, отбасын ажалдан құтқарып үлгерген тәртіп сақшысы өзінің жаралы екенін кейін бір-ақ біледі. Бір отбасын ажалдан құтқарып қалған сержанттың өзі сол жерде көз жұмады. Дереу жеткен жедел жәрдем қызметі де оның өміріне араша бола алмады. Қазір күдікті қамауда. Қылмыстық кодекстің 99-бабы бойынша қылмыстық іс қозғалып, сотқа дейінгі тергеу жұмыстары басталды, – дейді облыстық полиция департаменті басшысының кеңесшісі Елена Кашарина.
Полиция сержанты Дархан Базарбаевтың артында анасы мен жары, 4 айлық ұлы қалды.
Нұрқанат ҚҰЛАБАЕВ
ҚОСТАНАЙ