Коронавирустың әлемге тарала бастағаны туралы алғашқы хабар түскеннен бастап Қазақстанда алдын алу шарасы өте жоғары деңгейде жасалып жатыр. Ең алдымен, ауру жұқтырып алмауы үшін Қытайда жүрген отандастарымыз елге қайтарылды. Сақтық шараларын жүргізу үшін Үкіметтен қаржы бөлінді. Барлық облыстарда инфекциялық және карантинге арналған орын дайындалды. Карантиндік орын ауру тараған елдерден келген азаматтарды 14 күн оқшаулауға арналды. Бұл инкубациялық мерзім деп аталады. Яғни, инфекция жұққаннан ауру басталғанға дейінгі аралықты қамтиды. Соңғы кезде ауру 24 күн өткеннен кейін байқалады деген де ақпарат бар. Соған байланысты екі апта карантинде болған адам жағдайына қарай үйінде немесе басқа түрде жеңілдетілген карантинде болуы тиіс.
Бүгінгі таңда бұл инфекция елге кірген жоқ. Бұл Үкіметтің, Денсаулық сақтау министрлігінің атқарған қызметінің нәтижесі деп санаймын. Әрине жұқпалы дерт келмейді деп бейқам отыруға да болмайды. Сақтық шаралары күшейтілген күйінде жүре береді. Бірақ соған көзқарас дұрыс болып, қорғаныс жағынан әрбіріміз үлес қосуымыз керек. Бұл үшін ең алдымен санитарлық гигиенаны сақтау, шектеу қойылған елдерге бармау, ал сол елдерден келгендер карантиндік мерзімді дұрыс түсініп, одан өткені жөн. Бұл халық үшін, адамның денсаулығы үшін істеліп жатқан жұмыс.
Бұл аурудың тарауы өте тез. Қайтыс болған адамдар да көп. Бүкіл құрлықта тарады деуге болады. Демек, бұл өте қатерлі инфекция. Сондықтан қазақстандықтар осы инфекция шыққан елдерге бармағаны жөн. Демаламын деп барып ауру алып қайтуыңыз әбден мүмкін. Қазақстан бұған дейін құс тұмауы, шошқа тұмауы сияқты инфекцияға қарсы тұра алды. Біраз тәжірибе жиналды. Егер инфекция тарала қалған жағдайда біздің медицинаның күші жетеді деп ойлаймын.
Жақсылық Досқалиев,
медицина ғылымдарының докторы, профессор