Елорданың «Астана» футбол клубы «Астана Арена» спорт кешеніндегі жөндеу жұмыстарына байланысты Премьер-лигадағы бірнеше ойынын басқа стадионда өткізуге мәжбүр.
Әуелде клуб басшылығы ойындарды Қостанай немесе Қызылорда қаласында өткізуді жоспарлаған болатын. Бірақ соңғы таңдау Алматы қаласына түскен екен. Енді жаңа маусымның бастапқы кездесулерін Михал Билек шәкірттері Алматы қаласындағы «Жас Қыран» стадионында өткізеді. Стадионға 2018 жылдың қараша айында ФИФА сертификатын алған жасанды алаң төселген. Стадионның жалпы сыйымдылығы 1500 көрерменге шақталған.
Былтырғы ел чемпиондары Алматыдағы алғашқы ойынын 7 наурызда Петропавлдың «Қызылжар» командасына қарсы өткізеді.