Дәл қазіргі сәттерде Алматының инфекциялық ауруханаларында коронавирус дерті расталған 22 пациент жатыр. Бүгін Алматыда тағы 3 адамда коронавирус анықталғаны белгілі.
Үш науқастың алғашқысы шетелден вирус жұқтырып келгендермен байланыста болған әйел адам.
Ауру белгілері пайда болғаннан кейін бұл әйел 18 наурызда CОVID-19 вирусына анализ тапсырған. Өкінішке орай, кеше медициналық сараптама нәтижесі бұл адамда вирус бар екендігін растады.
Коронавирус жұқтырғаны анықталған екінші әйел адам Берлин-Алматы чартерлік рейсінің жолаушылар серігі болып табылады. Ол 12 наурыздан бері инфекциялық ауруханада карантинде жатқан болатын.
Ал, 1997 жылғы үшінші ер-азамат 19 наурыз күні түнде Париж-Минск-Алматы рейсімен ұшып келіп, бірден провизорлық госпитальға оқшауланып, бүгін Қалалық инфекциялық ауруханаға ауыстырылды.
Осы сәтттерде 20 науқастың жағдайы бірқалыпты, 2 адамның халі орташа ауыр.
Бүгін қаланың провизорлық госпиталінде 696 азамат жатыр. 1108 адам – үй карантинінде отыр.
АЛМАТЫ