Алматының әкімшілік соты төтенше жағдай режимін бұзуға қатысты бір тәулікте 93 істі қарады. Әкімшілік құқық бұзушылық туралы кодексінің 476-бабына сәйкес, шаһардың мамандандырылған ауданаралық әкімшілік соты тәртіпке бағынбаған бірқатар азаматтарға айыппұл арқалатқан. Соңғы екі аптада 10 адам әкімшілік қамауға алынса, 61 адамға айыппұл салынған. Сондай-ақ 22 тұрғынға ескерту жасалыпты.
«28 наурыздан бастап 604 адам көшеде себепсіз жүргені үшін әкімшілік жауапкершілікке тартылды, оның алтауы қамауға алынды, 52-сіне айыппұл салынды, 17 адамға ескерту жасалды. Бақылау-өткізу бекеттерін айналып өтіп, қалаға кіру тәртібін бұзғаны үшін 18 адам жауапқа тартылды», – дейді Алматы қалалық ПД басшысының бірінші орынбасары Нұрлан Алмасбеков.