Көкшетау қалалық әкімшілігі мұндай техниканың санаулы ғана екендігін айтып отыр. Қазір олар тестілеуден өткізілуде. Осылайша қазақстандық агро-инновациялық корпорациясы вируспен күресуге үлес қоспақ.
«Каик» кәсіпорнының мамандары құрастырған техника коронавируспен күреске қолданылуда. Қазіргі уақытта қала көшелерін дезинфекциялау жұмысы қызу жүріп жатыр. Қалалық әкімшіліктің ақпараты бойынша әзірге осындай 3 техника жұмылдырылған. Арнайы дезинфекциялау сұйықтығымен толтырылған бір көлік аз уақыттың ішінде бес жүз шаршы метрге дейінгі жол төсесімін дезинфекциялай алады.
– Уәлиханов пен Горький көшелеріне сағат екіде шықтық. Содан Абылайхан даңғылына дейін дезинфекциялап өттік. Қазір екінші айналымда келе жатырмыз, сағатына 8-10 шақырымдық жылдамдықпен жүріп, 12 шақырымды қамтыдық, – дейді «Тазалық» серіктестігінің көлік жүргізушісі Борис Астафьев.
Мұндай техника негізінен ауыл шаруашылығына қолданылады. Әлемді жайлаған індетпен күресте бұл агрегаттар қазіргі уақытта таптырмас құралға айналды. «Қазақстандық агро-инновациялық корпорациясы» серіктестігі суарғыш көліктерді бейімдеп жасауда.
– Біз мұның бәрін танап басында тыңайтқыштар, химикаттар себетін құрылғылар негізінде жасап шығардық. Нәтижесінде пайдалануға жарамды болып шықты, – дейді «Кaik» серіктестігі өндірістік цехының бастығы Қайрат Дүйсембеков.
Дезинфекцияға пайдаланылатын зат адамдар мен жануарларға қауіпсіз. Ол тек вирустарға ғана әсер етеді. Ал дезинфекция COVID-19 вирусынан қорғанудың ең тиімді жолы.