Қызылордада коронавирустық инфекция жұқтырған науқастар саны 149 адамға жетті. Өңірлік коммуникациялар қызметінде өткен брифингте облыстық денсаулық сақтау басқармасының басшысы Жақсылық Әбдісәметов жаңадан анықталған 2 жағдай туралы айтып өтті.
- Бұл 2 науқас та бұрын анықталған науқастармен тікелей қарым-қатынаста болып, карантинге алынғандардың арасынан анықталып отыр. Қауіпті індет жұқтырғандар жұқпалы аурулар ауруханасына ауыстырылып, тиісті емдерін қабылдауды бастады, – деді ол.
Облыста індет жұқтырғандармен байланыста болғандардың жалпы саны 2181 болып отыр. Оның ішінде, жақын қарым-қатынаста болғандар саны 1146, жанама байланыста болғандар 1035 адам. Бүгінгі таңда барлығы бақылауға алынған.
Аймақтың бас дәрігері өңірдегі карантиндік шектеу талаптарының арқасында тікелей инфекция жұқтыру деңгейі төмендегенін де атап өтті.