Кеше Орталық коммуникациялар қызметінде өткен дәстүрлі брифингте ресми өкіл Алтай Әбибуллаев апта ішінде еліміздің ішкі және сыртқы саясатына қатысты жүргізілетін басты оқиғаларды журналистер назарына ұсынды.
Кеше Орталық коммуникациялар қызметінде өткен дәстүрлі брифингте ресми өкіл Алтай Әбибуллаев апта ішінде еліміздің ішкі және сыртқы саясатына қатысты жүргізілетін басты оқиғаларды журналистер назарына ұсынды.
Алда қылышын сүйретіп кәрлі қыс келе жатқандықтан, оған дайындық барысының да Үкімет назарында екендігін журналистер қаперіне салған ресми өкіл осыған орай 24 қыркүйекте Премьер-Министр Серік Ахметовтің төрағалығымен болатын Үкімет отырысында елдің барлық өңірлерінде жылу беру маусымына деген дайындық мәселесі қаралатынын жеткізді.
Осы апта ішінде, яғни 25 қыркүйекте Астанада Кеден одағының және Қазақстан, Ресей, Белоруссияның Біртұтас экономикалық кеңістігінің жоғары органы болып табылатын Жоғары еуразиялық экономикалық кеңестің жұмысы жүретіні және оған Премьер-Министр Серік Ахметовтің қатысатыны да брифингте мәлім болды. А.Әбибуллаев сол күні Мемлекет басшысы Нұрсұлтан Назарбаевтың отырысқа қатысушы тараптар – Қазақстан Премьер-Министрі Серік Ахметовті, Ресей Үкіметінің Төрағасы Дмитрий Медведев пен Беларусь Үкіметінің Премьер-министрі Михаил Мясниковичті қабылдайтынын айтты.
Жалпы, Ресей Үкіметі төрағасының Астанаға сапары аясында ресейлік тараппен екіжақты қарым-қатынастың ауқымды мәселелері, сауда және энергетикалық ынтымақтастықтың негізгі тетіктері, ғарыш саласындағы өзара ынтымақтастық, сонымен қатар, Екатеринбургте өткелі отырған 10-шы мерейтойлы Қазақстан-Ресей өңіраралық форумына дайындық пен Кеден одағы және Біртұтас экономикалық кеңістік аясындағы өзара ынтымақтастықты жетілдіру шаралары егжей-тегжейлі талқыланатын көрінеді.
Осыдан кейін брифингте журналистер алдына шыққан Ауыл шаруашылығы министрі Асылжан Мамытбеков биылғы егін жинау науқанының өзгешеліктерін ортаға салды. Оның айтуынша, биыл ауа райының қолайсыз жағдайына байланысты еліміздің үш негізгі бидай өсіруші облыстарында егін жинау науқаны екі аптаға кеш басталған.
Статистика агенттігінің мәліметіне сүйене деректер келтірген министр 2013 жылы барлық ауыл шаруашылығы дәнді дақылдарының егістік алқаптары 21,5 млн. гектар құрап отырғанын жеткізді. Соңғы 21 қыркүйектегі деректерге қарағанда, 10,3 млн. га (65,0%) жердің егіні жиналған көрінеді. Министр өз сөзінде биылғы егін жинау науқанының кеш басталғанына қоса, өзге де қиындықтар туып отырғанын жеткізді. Диқан қауымына ауа райына және егістік алқаптардың жалпы күйіне орай (арамшөптілік және т.б.) жинау жұмыстарын екі сатылық әдіс арқылы жүргізуге тура келгенімен де бөлісті.
Сондай ақ, Асылжан Сарыбайұлы егін орағын өткізу барысына мемлекет тарапынан жасалған қолдау жайлы да әңгімелеп берді. Мәселен, биылғы егін орағына 410 мың тонна мөлшерінде дизель отыны бөлініп, ол мұнай өңдеу зауытынан литрі 78 теңгеден сатып алынғанын айтқан министр диқанға жеткен отынның нарықтағы бағадан 10 пайызға арзанға түскенін де назарға салды.
Министр брифингте астық қабылдау кәсіпорындарының (АҚК) астық сақтауға дайындығына да тоқталып өтті. Бүгінгі таңда астық сақтайтын сыйымдылықтар 24,6 млн. тоннаны құрап отыр, бұл болжамдалған 18,5 млн. тоннадай астықты сақтауға мүмкіндік береді, деген ол 19 қыркүйекте АҚК-лерге жеткен астық көлемін жария етті. Ол бойынша 2053,2 мың тонна астық кірсе, оның ішінде бидайы 1869,2 мың тонна, арпа 147,1 мың тонна, басқа да дәнді дақылдар 26,3 мың тонна, күріш 10,6 мың тоннаны құраған көрінеді.
Егін орағы кеш басталса да, ел ризығы кемімесе керек.
Анар ТӨЛЕУХАНҚЫЗЫ,
«Егемен Қазақстан».