Қызылорда қаласындағы емдеу мекемелеріне жергілікті кәсіпкерлер көмегімен алынған құрылғылар жеткізілді. Індет құрығына ілінген жерлестеріне жәрдем берген азаматтардан 39,7 млн теңге жиналып, оған өкпеге жасанды тыныс беретін 1 аппарат пен 15 оттегі концентраторы алынған.
«Сәт-Сервис», «Бақ-Береке 2030», «Асанас-Дар», «МетПромМонтаж», «Нұр-Ай Ақжол», «Алтын Айдарлы» жауапкершілігі щектеулі серіктестіктері мен «Сапақ» өндірістік кооперативі демеушілігімен алынған құрылғыларды дәрігерлерге табыстау салтанатына қала әкімі Нұрлыбек Нәлібаев қатысты. Өкпеге жасанды тыныс беретін аппарат пен 2 оттегі концентраторы қалалық ауруханаға берілсе, облыстық жұқпалы аурулар ауруханасына 3, облыстық балалар ауруханасына 5, «Ана мен бала» орталығына 5 құрылғы табыс етілді.
Қиын кезеңде қолдан келген көмегін аямай, дертті жеңуге үлес қосқан кәсіпкерлерге шаһар басшысы қала тұрғындарының атынан алғыс білдірді. Қазір індетке қарсы күреске жұмылған еріктілер қатарында кәсіпкерлер, құрылысшылар, мәслихат депутаттары да бар. Осы еріктілер еңбегімен аз уақытта облыс орталығының өзінде ғана 56,2 млн теңгеден аса қаржы жиналып, аймақ орталығындағы емдеу мекемелеріне қажетті құрал-жабдықтар алынды.
ҚЫЗЫЛОРДА