Пикассо мен Моненің картиналарын сағынсаңыз, яки Джакомметтидің мүсінін тамашалағыңыз келсе, мархабат. Осы аптадан бастап Нью-Йорк музейлері ұзақ уақытқа созылған демалыстан соң қайта ашылды, - деп хабарлайды Egemen.kz.
Манхэттендегі заманауи өнер музейі (МоМА) өз жұмысын қайта жалғастырғанымен, өнер ордасына келуші жұрттың қарасы көп емес. Әрине, бұл карантиндік қатаң ереженің сақталуынан болып отыр. Бұдан бөлек Нью-Йорктегі Метрополитен өнер музейі де өз жұмысын бастады. Келушілерінің саны шектеулі музейдің аптадағы бес күн бойы есігі ашық. Мұнда да санитарлық ережелерді сақтап, бетперде тағу һәм арақашықтықты бұзбау – басты назарда. Қатаң шараларға байланысты Метрополитен ашылған алғашқы күні әдеттегідей 30-40 мың емес, 10 мың қонақты қабылдаған.
Айта кетейік, пандемия салдарынан Метрополитен өнер музейі карантиндегі уақытта 150 млн доллар жоғалтып, 400 қызметкерін қысқартқан. Бұл жағдайға Нью-Йорктағы барлық өнер ошақтары тап болып отыр.