1945 жылдың маусым айында Кеңес Одағы халқы мен оның қарулы күштері үшін ерекше мереке болды. Мәскеуде Жеңіс құрметіне арналған әскери шеру өткізілді.
Неміс-фашист басқыншыларын талқандауда ерекше көзге түскен Кеңес қарулы күштерінің әр түрінен жасақталған таңдаулы полктер Жеңіс парадына қатысты. Замана тарихының төрінен орын алатын осы бір есте қаларлық оқиғаның куәсі болғандар қатары жылдан-жылға азайып келеді.
Сол әскери шеруге қатысқан капитаны Шайғаппас Егеубайұлы Егеубаевты кейінгі ұрпақ бүгінде дейін мақтан тұтады. Өткен күндерді Шайғаппас Егеубайұлы көзі тірісінде былай деп еске алған еді:
«Жеңіс парадына қатысқанды өз басым мақтан тұтатамын. Сол күні менің тұла бойымды халықтық мақтаныш билеп жүрді... Мәскеудегі Қызыл алаңда бір сәт тылсым тыныштық орнады. Сонан соң екі жүз барабан дүрсілі астында фашистердің свастикалы кара жалаулары Ленин мавзолейінің іргесіне лақтырылды...»
Шайғаппас Егеубаев 1924 жылы Павлодар облысы, Май ауданы, Абай ауылында дүниеге келген. Кіші Ақжар жерінде білім алған. 1941 жылы 18 қазанда әскерге шақырылған. Алтай артиллериялық училищесін бітірген. Соғысқа 1942 жылдың маусымынан бастап қатысқан. Әуелі взвод, кейін батарея командирі болған. 1947 жылы әскер қатарынан оралған.
Ерліктері үшін «Қызыл Ту», «І дәрежелі Отан соғысы», екі мәрте «Қызыл Жұлдыз» орденімен және «Ерлігі үшін» медальдарымен марапатталған. 1945 жылы Мәскеуде Жеңіс парадына қатысқан.
1947 жылы соғыстан оралған соң еңбекке араласты. Май аудандық комсомол комитетінің бірінші хатшысы, партия ұйымының хатшысы, аудандық мәдениет бөлімінің бастығы қызметтерін абыроймен атқарды. Кейінде, құрметті демалысқа шыққанша Ақшиман жалпы орта білім беретін мектебінде алғашқы әскери даярлық пәнінен мұғалім болып қызмет етті.
1995 жылы Ұлы Отан соғысындағы Жеңістің 50 жыл мерекесіне орай Алматыдағы Республикалық шеруге қатысты. 1996 жылы дүниеден өтті. Біздің, жерлестерінің Шайғаппас Егеубайұлына өзі жұмыс істеген Ақшиман мектебіне есімі берілсе деген тілегіміз бар. Жеңістің 75 жылдық мерейтойы қарсаңында қаһарман тұлғалардын есімдері әспеттеліп, жоғары деңгейде құрмет көрсетілер деген ойдамын.
Берік ЕСКЕНДІРОВ
Павлодар облысы,
Май ауданы,
Баскөл ауылы