Сайлауалды бағдарламаның жобасы талқыланды

– Елбасы, партия Төрағасы Н.Ә.Назар­баевтың тапсырмасымен партияішілік сайлау өткізу кезінде еліміз бойынша азаматтардан 20 мыңнан астам ұсыныс жиналды. Оның мыңнан астамы Қостанай облысының тұрғындарынан түсті.

Талдау көрсеткендей, қарапайым халық негізінен ауыл ішіндегі жолдардың сапасы, су және газбен қамту, тұрғын үй мен білім беру нысандарын салу, ауылдық мектептерде компьютер техникаларын жаңарту мәселелерін көтеруде. Тұрғындардың ауылдағы интернеттің жылдамдығына да көңілдері толмай отыр. Көтерілген мәселелердің өзектілігін ескеріп, оларды облыстық сайлауалды бағдарламада көрсету қажеттігін айттым. Өңір халқының үштен бірі ауылдық жерде тұратындықтан, партияның Қостанай облысы бойынша сайлауалды бағдарламасы ауыл шаруашылығын қолдау шараларын көздейді. Сонымен, таяудағы 5 жылда облыста егіс алқаптарын әртараптандыруды қамтамасыз ету, жаңа суармалы жерлерді айналымға енгізу, техниканы жаңарту, сондай-ақ өңдеуші ауылшаруашылық кәсіпорындарын іске қосу мен жаңғырту жоспарлануда, – деді Бауыржан Байбек.

Партия Төрағасының бірінші орынбасары одан кейін өңірді табиғи сүтпен және жоғары сапалы ашытылған сүт өнімдерімен қамтамасыз етіп отырған «Олжа Садчиковское» серіктестігіне барып, кәсіпорын өндірісімен танысты. Бүгінде 320 адамды тұрақты жұмыс орнымен қамтамасыз етіп отырған бұл кәсіпорын аймақтағы дамыған жоғары технологиялы өндірушілердің бірі. Кәсіпорын қызметкерлерімен кездесу барысында Садчиков ауылының тұрғыны Тамара Киселева осы елді мекендегі жалпы ұзындығы 6 шақырым болатын екі орталық көшеге жөндеу жүргізуді өтінді. Бұл көшелердің бойында 1350-дей тұрғын бар. Бауыржан Байбек тағы бірнеше жұмысшының өтінішін тыңдап, бұл мәселелердің жүзеге асырылуын тікелей өзі бақылауына алатынын жеткізді.

Бауыржан Байбек одан кейін Қостанай қаласындағы жаңа модульді инфекциялық ауруханамен танысып, өңірдің медицина қызметкерлерімен денсаулық сақтау ұйымдарының коронавирус панде­мия­сының туындауы мүмкін екінші толқы­нына дайындығын талқылады.

Nur Otan партиясы Төрағасының бірінші орынбасары жұмыс сапары барысында Арқалыққа аялдап, Nur Otan-ның қалалық сайлауалды бағдарламасының жобасы туралы тұрғындармен пікірлесті.

Арқалық сапары туралы Б.Байбек әлеуметтік желідегі жеке парақшасына: «Ар­қа­лыққа келдім. Өздеріңіз білетіндей, пар­тия Төрағасы Н.Ә.Назарбаевтың тап­сыр­­­масымен әрбір елді мекеннің ерекше­лігі мен мәселелерін ескере отырып, Nur Otan тұңғыш рет әр өңір, қала мен ау­дан бойынша 216 сайлауалды бағдар­ла­ма­ның жобаларын әзірледі. Елбасы атап өткендей, Nur Otan – нақты істер­дің пар­тиясы, біздің сайлауалды уәделері­міз­дің барлығы тыңғылықты есептелуі тиіс». Сондықтан 5 жылдық бағдарла­ма­лар­да көрнекі индикаторлар көрсетілді, бюд­жеттің мүмкіндігімен сәйкестен­дірілген нақты басымдықтар реті көзделді. Ел Президенті Қ.К.Тоқаевтың «Халық үніне құлақ асатын мемлекет» тұжырым­дамасы іске асырыла отырып, партияның бар­лық сайлауалды бағдарламалары азаматтардың талап-тілектері ескеріліп пысықталады.

Сонымен Арқалық қаласында партия­ішілік праймериз барысында 117 нақты ұсыныс түсті. Тұрғындарды аула алаң­дарын абаттандыру мен көшелерді жа­рықтандыру, білім мен денсаулық сақтау ны­сандарын, жолдар мен инженерлік желі­лерді жөндеу секілді мәселелер толған­дырады.

Партия филиалы басшылығының мәліметінше, осы мәселелердің барлығы бағдарламаларды пысықтау кезінде ескерілген. Сонымен бірге бағдарламаның бірқатар бағыттары қосымша пысықтауды қажет етеді деп санаймын.

Мысалы, қазіргі таңдағы өзекті мәселе­лердің бірі – 13 елді мекенді ұялы байланыспен қамтамасыз ету және интернеттің жылдамдығын арттыру. Бұдан басқа, қала тұрғындары балалардың ойын алаңдары сапасының нашарлығына шағым айтып, ескі автобустарды ауыстыру мәселесін көтеруде.

Торғай боксит кен басқармасының жабылуы жоспарлануына байланысты 500-дей адамды жұмыспен қамту қажет. Сайлауалды бағдарлама аясында бұл мәселе партиялық бақылауға алынады. Бұл ретте босатылатын адамдардың бір бөлігі қазіргі кезде басқа кәсіпорындарға жұмысқа орналасты.

Солардың бірі – «Торғай Ет» ет өңдеу кешені. Облыс әкімі Архимед Мұхамбетовпен бірге қалада 120-дай жаңа жұмыс орнын құруға мүмкіндік берген өндіріс алаңын араладым.

Сапар барысында қаланы жылумен қамту жүйесін реконструкциялау жайымен де таныстым. Осының аясында Арқалық ЖЭЦ-і мазуттан көмірге көшірілмек. Бұл шара жыл сайын 2 миллиардқа дейін бюджет қаражатын үнемдеп, оны қаланың басқа қажеттіліктеріне қайта бағыттауға мүмкіндік береді. Бұл жобаны 2021 жылы аяқтау міндеті Nur Otan партиясының сайлауалды бағдарламасына енгізілген.

Сонымен қатар Арқалық аймақтық ауруханасының ұжымымен кездестім. Мемлекет басшысы Қ.К.Тоқаев таяу­да сөйлеген сөзінде пандемияның екін­ші толқыны болған жағдайда негізгі ауырт­палықтың тағы да дәрігерлерге түсеті­нін атап өткен болатын. Оның тапсыр­масы бойынша екінші жарты­жыл­­дықта төлемақыға 150 миллиард теңге­ден астам қаражат бөлінді. Nur Otan пар­тия­сы фракциясының депутаттары биыл ме­дицина қызметкерлерінің әлеу­мет­тік мәр­тебесін көтеру мен қорғауға бағыт­талған жаңа «Денсаулық туралы» кодексті қа­был­дады.

Медицина қызметкерлерімен бірге партияның сайлауалды бағдарламасын талқыладық. Онда денсаулық сақтау нысандарының материалдық-техникалық жабдықталуын жақсарту және халыққа медициналық қызмет көрсету сапасын арттыру бойынша нақты индикаторлар қамтылған», деп жазды.

Қостанай облысы