Қазір ең күрделі жобаларды қаржыландыруға дайын
Кеше «Қазақстанның даму банкі» АҚ-та баспасөз конференциясы болып өтті. Банкте 2010-2013 жылдар аралығында атқарылған жұмыстар қорытындыланды. Сондай-ақ, банктің басқарма төрағасы Нұрлан Құсайынов осы айдың 25 жұлдызынан бастап басқа қызметке ауысатын болғандықтан уәкілеттігін мерзімінен бұрын тоқтататындығын жариялады.
Қазір ең күрделі жобаларды қаржыландыруға дайын
Кеше «Қазақстанның даму банкі» АҚ-та баспасөз конференциясы болып өтті. Банкте 2010-2013 жылдар аралығында атқарылған жұмыстар қорытындыланды. Сондай-ақ, банктің басқарма төрағасы Нұрлан Құсайынов осы айдың 25 жұлдызынан бастап басқа қызметке ауысатын болғандықтан уәкілеттігін мерзімінен бұрын тоқтататындығын жариялады.
Конференцияға Премьер-Министрдің орынбасары – Индустрия және жаңа технологиялар министрі Әсет Исекешев, «Бәйтерек» ұлттық басқару холдингінің басқарма төрағасы – ҚДБ директорлар кеңесінің мүшесі Қуандық Бишимбаев, банктің тәуелсіз директоры Уольф Вокурка, ҚДБ басқарма төрағасы Нұрлан Құсайынов қатысты. Шараны банктің тәуелсіз директоры жүргізді. Ол Қазақстан даму банкінің мақсат-міндеті мен қызметі туралы айта келіп, бірінші сөз кезегін банктің директорлар кеңесінің төрағасы Әсет Исекешевке берді.
«Елімізде жүргізіліп жатқан индустрияландыру шарасы – мемлекеттік саясатымыздағы басым бағыттардың іргелі әрі ілгерісі екені мәлім. Ал осы Мемлекеттік үдемелі индустриялық-инновациялық даму бағдарламасын жүйелі қаржыландыратын және оның басты операторларының бірі Қазақстанның даму банкі. Сондықтан аталған банктің жұмысын үнемі жүйелеп отыру өте маңызды. Бірінші айтарымыз, 2010-2013 жылдар аралығында банк ел экономикасына 3 млрд. доллардан астам қаржы салды. Осы кезеңдерде, елімізде жалпы құны 7 млрд. доллар болатын 36 ірі жоба мақұлданған. Даму банкі осы жобаларды жүзеге асыруға белсене қатысып, оларға 4,3 млрд. доллар құйыпты. Біле-білгенге бұл аса ауқымды жұмыс», деді Премьер-Министрдің орынбасары.
Қазіргі уақытта Қазақстан даму банкінің басты операторлығымен дүниеге келген кешенді жобаларда 10 мыңнан астам адам еңбек етіп жатыр. Осыдан үш жыл бұрын аяғын енді ғана тәй-тәй басқан банктің аз уақыттың ішінде осындай биік көрсеткішке қол жеткізуі, оның басшылары мен қызметкерлерінің қаржыны білікті басқара білуінің нәтижесі. «ҚДБ Мемлекет басшысы жүктеген міндеттерді абыроймен атқарып шығып, банктің тиімділігі мен корпоративті басқару қызметін жақсы жетілдіре білгенін де айтқым келеді. Бүгінде даму банкі халықаралық стандарттардың бәріне сай қызмет етіп жатыр деуге толық негіз бар», – деп қорытындылады сөзін Ә.Исекешев.
«Бәйтерек» холдингінің басшысы Қ.Бишимбаев ҚДБ жұмысындағы кәсібилікті жоғары бағалады. Сөйтіп, банктің басқарма төрағасы Н.Құсайыновқа алғысын білдірді. Холдинг басшысының сөзіне қарағанда, өркендеу жолындағы банк бүгінде коммерциялық институттарға тартымды емес, бірақ елге аса қажет кез келген ірі және қиын жобаны қаржыландыруға дайын көрінеді.
«Үш жыл бұрын банк пен оның басшысы болып табылатын менің алдымда бірқатар мақсаттар тұрды. Шүкір, сол биік мақсаттарды игеріп келеміз. Нәтижесінде көптеген ауыр және маңызды өзгерістерден өттік. Банктің стратегиясы түзелді, міндеттемелерді басқару жақсарды. Қиюы қиын жобаларды еліміздің инвестициялық қорына тапсыру мен балансты тазалау бойынша бірегей мәміле жүргізіліп, бизнес үдерістерді оңтайландыру шаралары тиімді қабылданды», – деді Н.Құсайынов.
Даму банкінің бүгіні мен келешегі туралы әңгімелеген Уольф Вокурка, корпоративті басқарудың жоғарғы деңгейін меңгерген банктің дәл қазір төрт аяғынан нық тұрғанын жеткізді. Конференцияның екінші бөлімінде директорлар кеңесінің мүшелері тілшілердің сұрақтарына жауап берді.
Нұрбай ЕЛМҰРАТОВ,
«Егемен Қазақстан».