Astana IT University ғылыми кітапханасында Қазақстан Республикасының Тұңғыш Президенті – Елбасы кітапханасының қолдауымен «Н.Ә.Назарбаевтың жыл сайынғы Жолдауы аясында білім беруді жаңғырту және цифрландыру» атты альбомның тұсауы кесілді.
– Елбасы бастамаларын жүйелі бейнелейтін альбомның жарық көруі – ортақ еңбегіміздің жемісі, – деп маңызды жиынның беташар сөзін айтқан Елбасы кітапханасының директоры, саяси ғылымдар докторы, профессор Әмірхан Рахымжанов, Тұңғыш Президентіміздің алдыңғы қатарлы мемлекеттермен бірдей экономикалық көшбасшылыққа қол жеткізуде цифрлы технологияларды игеру мен енгізуінің маңызына тоқталды.
Одан кейін маңызды шараның мәні жайлы пікір білдірген Astana IT University ректоры, техника ғылымдарының докторы Дархан Ахмед-Заки, адамның парасаты бойындағы білімі – жеке қасиеттері мен құндылық бағдарымен бағаланатыны жайлы айтып: «Қазіргі ақпараттық кезеңде елдің дамуы да ұлттың зияткерлік әлеуетіне тікелей байланысты болып отыр. Елбасы Жолдауларының басты постулаты осы ақиқатқа негізделеді. Қазақстанның қоғамдық-саяси өміріне жаңа ұғымдар енген соң тың мақсаттарды жүзеге асыру ісі жаңа көзқарастарды қажет етті. Осы тұста Нұрсұлтан Әбішұлы жастардың ақыл-қайратына сенім артып, олардың әлеуетін жақсартуға қолайлы жағдай жасады. Нәтижесінде еліміз экономиканың, саясаттың және қоғамдық қатынастардың түрлі саласындағы интеграциялық процестерге көбірек тартыла бастады. Назарларыңызға ұсынылып отырған альбом – бұл жұмыстардың айқын көрінісі», деді.
– Елбасы кітапханасы мен Astana IT University құрастырған альбомнан Нұрсұлтан Әбішұлы көтерген бастамалардың бәрі адамзат әлеуетін жаһандық бәсекеге қабілетті етуге бағытталғанын түсініп, еліміздегі білім беру жүйесінің жер-жаһан трендтерімен тұспа-тұс дамып келе жатқанын аңғаруға болады. Альбом Елбасының стратегиялық болжамын мазмұндайтындықтан, өскелең ұрпаққа құнды дерек болмақ, – деді іс-шараның қадірлі қонағы, Білім және ғылым министрінің кеңесшісі, саяси ғылымдар докторы Амантай Нұрмағамбетов.
Тұсаукесер барысында Елбасы кітапханасы мен Astana IT University ынтымақтастық меморандумына қол қойды.