Республикамыздың батыстағы қақпасы – Орал қаласында өндірістің өзге салаларына қарағанда машина жасау және қорғаныстық-өнеркәсіптік кешен сынды стратегиялық сипаттағы салалар жақсы дамыған. Яғни, еліміздің аталған кешен аясындағы басты бағытын айқындайтын факторлар Ақжайық аймағында қалыптасқан десек қателесе қоймаспыз.
«Қазақстан инжиниринг» ҰК АҚ құрамына кіретін өңірдегі қорғаныс кәсіпорындары соңғы уақытта арнайы өндіріс түрлерін конвейерге қою үшін жаңаша бір бетбұрыс жасай бастағаны байқалады.
Солардың бірі Батыс Қазақстан машина жасау компаниясы болып отыр. Рас, аталған кәсіпорын кейінгі кезде бұйығы күй кешіп, томаға тұйық қалғандай көрінетін. Әйтсе де бұл тек сыртқы құбылыс болып шыққанына сүйсінбесек ренжімейтін шығармыз. Шынтуайтына келгенде, мұнда бұған дейінгі моральдық тұрғыдан ескірген құрал-жабдықтар ығыстырылып, жаңа заманауи технологиялар енгізіліп жатыр екен. Соның негізінде кеңестік кезеңдегі «Металлист» қару-жарақ зауытында биыл жаңа жобалар қолға алына бастапты.
Соның бірі – мемлекетіміздегі құрлық әскерлерінің негізгі қаруы болып табылатын зеңбірек деуге әбден болады. Осылайша елімізде тұңғыш рет күші жойқын зеңбірек шығару өндірісі басталды деуге толық негіз бар. Сөйтіп алдымыздағы 2021 жылдан бастап отандық кәсіпорында мемлекеттік-қорғаныстық тапсырысқа сәйкес аталған қару түрі жасалмақ. Бұл үшін зауыттағы бұған дейінгі сынақ орталығы қайта жарақтандырылған. Сондай-ақ қару-жарақ өндірісіне қажетті полигон мәселесі де өз шешімін тауып үлгерген. Батыс Қазақстан машина жасау компаниясына құрлықта қолданылатын қаруларға қоса теңіз қаруларын құрастыруға да лицензия берілген.
ОРАЛ