Қаржы орталығына 287 компания тіркелді

АХҚО қаржылық қызметтер көрсетуді реттеу жөніндегі комитетінің хабарлауынша, 2020 жылдың қыркүйегінде тіркеу процесі толықтай онлайн режімге көшкен. Тиісінше, тіркеу мерзімі 7 күннен 1 күнге дейін қысқарды.

Сонымен қатар инвестицияларды сату және сатып алу бойынша әртүрлі платфор­ма­­ларға қатысты 5 жаңа қаржылық қызмет ен­гізіл­ген. Еске сала кетейік, АХҚО-да ұсы­ну­ға болатын қаржылық қызметтердің жал­пы саны – 35. Бұдан бөлек, кэптивті сақ­тан­дырудың 3 жаңа формасы іске қосылған.

Коронавирус пандемиясына байланыс­ты АХҚО-да реттеушілік бағытындағы қол­­­дау шаралары енгізілді. Бұл қаржы ор­та­­лығы алаңында жұмыс істейтін бизнес қауым­дастыққа қиын кезеңдерде өзінің не­гіз­гі басымдықтарына назар аударуға мүм­­кін­дік берді. Сондай-ақ негізгі капиталға қо­йыла­тын талаптар мен инвестициялық ком­па­ния­лардың өтімділік талаптары оңтайланды.

FinTech Lab-та 8 жаңа фирма тіркелген. Бүгінде барлығы 30 фирма бар. Олар краудфандинг, ақша қызметтері, цифрлы активтер және т.б. қызметтер ұсынады. Қаржылық қызметтер көрсетуді реттеу жөніндегі комитет АХҚО мен Қазақстаннның цифрлы актив­тері саласындағы заңнамалық актілер­дің талаптарын үйлестіруге ықпал етті.

Халықаралық қатынастар бағытында да ауқымды шаруа тындырылды. Атап айт­қанда, көпжақты екі келісімге қол қо­йылған. Яғни IOSCO кеңейтілген өзара түсі­ніс­тік туралы меморандум және сақтан­дыру қадағалаушыларының халықаралық қауым­дастығының (IAIS) көпжақты өзара түсіністік туралы меморандумы бекітілді. Екі келісім де нарықтардың дұрыс жұмыс істеуі мен қаржылық тұрақтылықты қамтамасыз ету үшін дүниежүзілік қадағалау саласындағы ынтымақтастық аясын кеңейтеді.

АХҚО соты мен Халықаралық төрелік орталығы қызметін 2018 жылғы 1 қаңтарда бастаған еді. Осы күнге дейін жалпы 296 істі ойдағыдай шешкен. Оның ішінде 291 іс 2020 жылды қарастырылған.

– АХҚО сотына 12 іс берілді және 9 ше­шім шығарылды. Халықаралық төре­лік ор­талығында төрелік талқылау мен медиацияны талап ететін 282 іс шешілді. Төрелік істердің саны едәуір өскен. Бірақ істер­дің көпшілігі медиация арқылы шеші­мін тапты. Халықаралық төрелік орталы­ғын­да дауларды медиация жолымен сәтті рет­­теу нәтижесінде істер бойынша одан әрі төре­лік ету немесе сот талқылауы қажет­тілігі азайған. Істерге 11 елдің тараптары қатысты. Оның ішінде Қазақстан, Ресей, Қытай, Өзбекстан және Ұлыбритания секілді мемлекеттер бар. Негізінен даулар бо­рыш­тық міндеттемелерге, өзге де қаржы мәс­елелеріне, қызметтер көрсетуге, еңбек қатынастарына және мүлікке (оның ішінде жер меншігіне) байланысты мәселелерге қатыс­ты болды, – деп хабарлады АХҚО соты мен Халықаралық төрелік орталығы.

Пандемияға байланысты АХҚО соты мен Халықаралық төрелік орталығы жұмысты толықтай онлайн режімге көшірген. Барлық даулар электронды түрде шешілді. Оның бәрі eJustice электрондық сот ісін жүргізу жүйесін қолдана отырып жүзеге асырылды. Барлық дауларды реттеу және шешу, сотқа дейінгі және сот тыңдауларын өткізу үшін заманауи бейнетехнологиялар қолданылған.

АХҚО сотында тараптардың мүдделерін сотта қорғау үшін 222 заңгер тіркелген. Олар­дың арасында АҚШ, Ұлыбритания, Еуропа, Орталық Азия, Африка, Азия, Аустра­лия және Жаңа Зеландиядан тіркелген 23 елдің (25 юрисдикция) заңгерлері бар.

– 2020 жыл АХҚО соты мен Халықаралық төрелік орталығы үшін айтулы жыл болды. Жаһандық COVID-19 пандемиясына байланысты туындаған қиындықтарға қарамастан, дауларды шешу қызметтері бүкіл әлемдегі бизнес пен іскер адамдар үшін өзінің тартым­дылығын дәлелдеді. Жаңа серіктестік қарым-қатынастарды құру және оқытудың ауқым­ды бағдарламаларын жүргізу нәти­же­сінде біз сот істерінің санын едәуір ұлғай­туға, сот және төрелік шешімдерді табыс­ты орындауға қол жеткіздік. Сондай-ақ Қазақ­стан мен Орталық Азияның заң және іскерлік қоғамдастығын дамытуға елеулі үлес қостық. Біздің қызметіміздің осы кезеңінде басқа халықаралық қаржы орталықтарындағы дауларды реттеу жөніндегі ұқсас орта­лық­тармен салыстырғанда, нәтижеміз күт­кенімізден асып түсті, – дейді АХҚО соты­ның және Халықаралық төрелік орталы­ғы­ның тіркеушісі және аппарат басшысы Кристофер Кэмпбелл-Холт.