Өңірлерге сапарлары барысында сенаторлар халықпен кездесіп, тұрғындарды толғандырған мәселелерге назар аударуды. Сондай-ақ кездесулер кезінде депутаттар Жолдаудан туындайтын міндеттер мен қабылданған заңдарда қамтылған негізгі басымдықтарды түсіндірді.
Сенат депутаттары Мұрат Бақтиярұлы мен Ләззат Сүлеймен Қызылорда облысы Жаңақорған ауданындағы заманауи құрал-жабдықпен жабдықталған «Orda-Сығанақ» шипажайындағы қызметкерлерімен кездесті. Кездесуде туризм саласына қатысты мемлекет тарапынан көрсетіліп жатқан жеңілдіктер мен қолдаулар туралы жан-жақты әңгіме қозғалды. Аудандық орталық стадионда спортшылармен және нұсқаушылармен кездесу барысында жақында еліміздің кейбір заңнамалық актілеріне мәдениет, дене шынықтыру және спорт мәселелері бойынша түзетулер қабылдау туралы заңның негізгі мақсаттары мен міндеттерін толықтай түсіндіріп берді. Депутаттар аудандағы 600 балаға арналып салынып жатқан орта мектептің құрылыс алаңына барып, құрылысшылармен кездесті. Мектеп құрылысы осы жылы аяқталып 1 қыркүйекте қолданысқа берілетіні айтылды. Сенаторлар Шиелі ауданындағы цемент зауытының жұмысшылармен, аудандық көпсалалы аурухана дәрігерлерімен, Шиелі индустриялық-аграрлық колледжінің мұғалімдерімен кездесті. Шиелі ауданының қарттарымен кездесуде «Ардагерлер туралы» заңның мүмкіндіктері мен міндеттері туралы айтылды.
* * *
Сенаторлар Бақтыбай Шелпеков пен Сүйіндік Алдашев Маңғыстау облысы Жаңаөзен қаласында газ-поршеньді электр стансасының ұжымымен кездесті, жаңадан ашылған жұмыс орындарын көрді және экономиканы әртараптандыру, индустрияландыру және отандық тауарларды сыртқы нарыққа шығару мәселелерімен танысты. Жаңаөзен қаласындағы қант зауытының еңбек ұжымымен кездесуде 2020 жылы Қазақстанда қабылданған жаңа заңдар, оларға енгізілген түзетулер мен толықтырулар туралы айтылып, қойылған сұрақтарға жауап берді. «Білім-Инновация» лицей-интернатының ұстаздарымен, «Мұнайшы» мәдениет үйінде қала тұрғындарымен кездесуде педагогтердің қоғамдағы беделінің көтерілуімен қатар, олардың еңбекақысының ұлғаюы, Жаңаөзен қаласының оңтүстігіне таман 70 шақырымда орналасқан «Кендірлі» аймағындағы Тоқмақ жерінде су тұщыту зауыты құрылысын салу жоспары туралы айтылды.
* * *
Сенат депутаттары Әбдәлі Нұралиев пен Бекболат Орынбеков Жамбыл облысындағы жұмыс сапары барысында Тараздағы бірқатар нысанды аралап, қаланың тыныс-тіршілігімен танысты. Сенат депутаттары №4 орта мектептің ескі ғимаратын жаңғырту жұмыстары мен Ә.Бөкейханов атындағы №1 гимназияға қосымша ретінде салынып жатқан 300 оқушыға арналған ғимарат құрылысын көрді. Коронавирус қаупі сейілмеген шақта инфекцияның таралуына қарсы және емдеу шараларына дайындықты тексеру де назардан тыс қалмады. Сенаторлар облыстық 200 орынды жұқпалы аурулар ауруханасы және медициналық жабдықтар шығаратын «Әмір және Д» зауытының жұмысымен де танысты. Білім мен денсаулық сақтау саласындағы объектілерді аралағаннан кейін «Таразэнергоорталығындағы» ТЭО-4 қазандықтың жұмысын бақылады.
* * *
Сенатор Владимир Волков Алматы облысының Қарасай ауданында мәслихат және жергілікті атқарушы органдардың, сондай-ақ прокуратура өкілдерімен кездесті. Сонымен бірге Жібек жолы ауылы маңынан өтетін жолды қайта қалпына келтіру жұмыстарымен танысты. Прокуратура өкілдерімен кездесуде «Қазақстан Республикасының кейбір заңнамалық актілеріне Қылмыстық процесте азаматтардың құқықтарын қорғауды және сыбайлас жемқорлыққа қарсы іс-қимылды күшейту мәселелері бойынша өзгерістер мен толықтырулар енгізу туралы» заңның жаңа нормаларын талқылады. Одан бөлек, кәмелет жасына толмағандарға қарсы қылмыстық әрекеттер үшін жауапкершілікті күшейту шаралары, сыбайлас жемқорлыққа қарсы заңнамалар және басқа да өзекті мәселелер бойынша сөз қозғады. Сенат депутаты аудандық жолаушылар көлігі және автомобиль жолдары бөлімінің өкілдерімен де кездесіп, сапалы жол құрылысы үшін қажетті техникамен және құрылыс материалдарымен жабдықтау мәселесін талқылады.
* * *
Сенат депутаттары Ғұмар Дүйсембаев пен Сағындық Лұқпанов Атырау мұнай өңдеу зауытының өндірістік қызметімен, жоспарлы жөндеу нәтижелерімен, «Tazalyq» жобасымен және өзге де бизнес-жобалармен танысты. Депутаттар зауыт жұмысшыларымен кездесіп, олардың әлеуметтік қамтылу мәселелерін тыңдады. Сондай-ақ олар Атырау қаласындағы кәріздік сулардың булану алаңының жұмыстарымен де танысты. Бұған дейін Атырау облысы әкімдігі мен «Атырау мұнай өңдеу зауыты» ЖШС арасында Атырау қаласының сол жағалауындағы «Сасықсай» булану алқабын қалпына келтіру жөніндегі меморандумға қол қойылып, нақты жұмыстар мен олардың орындалу мерзімі көрсетілген «Жол картасы» бекітілген болатын. Зауыт 2022 жылдың аяғына дейін 860 гектар жерді қалпына келтіреді.
Сондай-ақ сенаторлар Атырау қаласындағы «Береке» шағын ауданы мен «Талқайраң» елді мекеніндегі «Нұрлы жер» бағдарламасы бойынша салынып жатқан тұрғын үй құрылысының алаңында болды. Талқайраң ауылы маңынан бой көтеретін жаңа шағын аудандарда 25 мыңнан аса пәтерлі 430 тұрғын үй салу жоспарланған.
Сенаторлар Исатай ауданына қарасты Қызылүй елді мекеніне газ тарту мәселесімен танысты. Сенат депутаттары жағдайды бұрыннан білетіндерін айтты және елді мекенге газ тарту мүмкіндігін қарастыруға уәде берді. Сондай-ақ сенаторлар Мақат ауданында әлеуметтік нысан құрылыстарымен, Доссор кентінен Мақат ауылына тартылатын кәріз тазарту жүйесінің жұмысын көрді. Ұзындығы 38 км болатын су сору жүйесінің жобаның құны 3 млрд 762 млн теңге болды. Қазіргі кезде жүйенің жобалық-сметалық құжаттамасы жасақталып, сараптама нәтижесі күтілуде.
* * *
Сенатор Дәурен Әділбеков Ақмола облысының Ақкөл ауданында «Бизнестің жол картасы-2025» мемлекеттік бағдарламасы аясында ауылдық елді мекендерде пайдалануға берілген нысандармен танысты. Олардың бірі – Еңбек ауылындағы күрделі жөндеуден өткізілген «Еңбек» мәдени-спорт кешені. Сонымен қатар сенатор «Еңбек» мектебіне және сүт өнімдері фермасына барды. Кәсіпорын жұмысшыларымен кездесуде ауыл шаруашылығын дамытуға арналған субсидияларды алу тетіктерін жеңілдету, мал жайылымдарына қатысты проблемаларды шешу мәселелері талқыланды.
Депутат Көкшетау қаласында жаңа онкологиялық емхананың жұмысымен танысты. Бұл нысан жергілікті және облыс тұрғындарына емделуге, онкологиялық ауруларды ерте кезден анықтауға және жоғары деңгейде медициналық көмек алуға мүмкіндік береді.
Депутат Бурабай ауданына да барып, мемлекеттік индустриялық-инновациялық даму бағдарламасы аясында салынған нысандардың жұмысына назар аударды. Щучинск қаласында сенатор туристік нысандардың құрылысымен танысып, жергілікті әкімдік өкілдерімен өңірде туризмді дамытуға кедергі келтіріп отырған мәселелерді талқылады. Сондай-ақ депутат Макинск қаласындағы құс фермасының жұмысшыларымен кездесті.