Қазақстан Республикасы Тәуелсіздігінің 30 жылдығына орай Түркістан қаласында орналасқан «Әзірет Сұлтан» мемлекеттік тарихи-мәдени қорық-музейі «Тәуелсіздік бәрінен қымбат» атты көрме ұйымдастырды.
«Шараның мақсаты – биылғы жылдың басты мерекесі тәуелсіздіктің 30 жылында жеткен жетістіктерімізді әйгілеп, осы аралықта атқарылған аса маңызды саяси оқиғалар мен экономикалық өрлеу ісіндегі жетістіктерімізді халыққа көрсету», дейді көрмені ұйымдастырушы тарап.
Қожа Ахмет Ясауи кесенесінің үлкен Ақсарай және кітапхана бөлмесі сөрелерінде орналасқан жәдігерлер қатарына: мемлекетіміздің Ата Заңы – Қазақстан Конституциясы мен Мемлекеттік рәміздері, Қазақстан Республикасының Тұңғыш Президенті – Елбасы Нұрсұлтан Назарбаевтың тәуелсіздік жылдары атқарған абыройлы қызметін әйгілейтін фотоқұжаттар мен осы жылдары жарық көрген Елбасының құнды еңбектері және Мемлекет басшысы Қасым-Жомарт Тоқаевтың жуықта жарияланған «Тәуелсіздік бәрінен қымбат» атты мақаласына қатысты айтылған үзік ойлар һәм еліміздің 30 жылдағы өрлеу кезеңі туралы баяндайтын құнды мәліметтер қойылған.
Бұл маңызды мәдени оқиға жайлы пікір білдірген мекеме басшысы Нұрболат Қадырұлы «Ата-бабамыз армандаған азаттық байрағын қолда берік ұстау – бүгінгі ұрпақтың басты парызы. Әрбір қазақстандық – Отанын жүрегімен сүйіп, оны өркендету жолында адал қызмет ететін патриот болуы тиіс. Бұл көрме жастарды ұлттық құндылықтарымызды қадірлеуге, тарихын білуге ықпал етеді деген үміттенеміз», – деді.