Атырау облысының бас санитар дәрігері Мәдениет Танауов жаңа қаулыға қол қойды. Жаңа қаулыға сәйкес қоғамдық тамақтану орындарының жұмыс уақыты ұзартылып отыр, деп хабарлайды Egemen.kz.
«Қоғамдық тамақтану объектілеріне сағат 07:00-ден 24:00-ге дейін (ұжымдық іс-шаралар өткізбей, 50-ден аспайтын отыратын орын орнатып, 50%-ға дейін толтырылуымен, үстелдер арасындағы қашықтық кемінде 2 метр сақталуын қамтамасыз етіп), фудкорттар тек жеткізу қағидасы бойынша штаттық режимде жұмыс кестесін белгілей отырып, жұмыс жасауға рұқсат етіледі» делінген қаулыда.
Сондай-ақ күшейтілген санитариялық-дезинфекциялық режимді сақтай отырып, азық-түлік және азық-түлік емес базарлардың жұмыс кестесі сағат 09:00-ден 20:00-ге дейін белгіленді. Бірақ жексенбіде жұмыс істеуіне тыйым салынды.
Ал сауда үйлері мен орталықтары (павильондар, бутиктер), сауда желілері сағат 09:00-ден 22:00-ге дейін (толтырылуы объект сыйымдылығының 30%-нан асырмай, 1 келушіге 4 шаршы метрден кем емес), олардың ішіндегі азық-түлік супермаркеттері мен дәріханаларды қоспағанда жұмыс істеуіне рұқсат етілді.