Ақпарат және қоғамдық даму министрі Аида Балаева және Парламент депутаттары, сарапшылар, азаматтық қоғам өкілдерінің қатысуымен «Қоғамдық бақылау туралы» заң жобасын талқылау бойынша онлайн режімде дөңгелек үстел өтті.
Аида Балаеваның айтуынша, әзірленген заң жобасы – бұл барлық мүдделі тараптар, соның ішінде сарапшылар, заңгерлер, құқық қорғаушылар, қоғам қайраткерлері кіретін жұмыс тобы мүшелерінің ұжымдық еңбегі.
Сондай-ақ ол заң жобасын әзірлеу кезінде қоғам өкілдерінің қағидаттық ұстанымдары толық ескерілгенін атап өтті. Заң жобасына сәйкес қоғамдық бақылауды жүзеге асыратын тұлғалар тобы айтарлықтай кеңейтіліп, олардың ішіне Қазақстан Республикасының азаматтары мен коммерциялық емес ұйымдар кірді.
Сонымен қатар қоғам өкілдерінің ұсыныстары бойынша қоғамдық бақылау объектілерінің тізбесіне бюджет қаражатын алатын заңды тұлғалар енген болатын. Заң жобасында қоғамдық бақылаудың бірқатар маңызды қағидасы бекітілген, олардың ішінде алуан түрлі нысандар, адамның және азаматтың конституциялық құқықтарын, бостандықтары мен заңды мүдделерін сақтау, жариялылық, ашықтық, қоғамдық бақылауды жүзеге асырудың заңдылығы қамтылады.
Заң жобасын талқылау барысында Қазақстанның Адам құқықтары жөніндегі уәкілі Эльвира Әзімова заң жобасының азаматтық қоғам үшін маңыздылығын және қоғамдық бақылауды заңнамалық реттеу қажеттілігін айтты.
Заң жобасын әзірлеушілердің сөзіне қарағанда, аталған заң жобасының ерекшелігі – ол мемлекеттік тілде әзірленуінде. Заңды әзірлеуге Л.Н.Гумилев атындағы ЕҰУ Құқық және салыстырмалы құқықтану ҒЗИ директоры, заң ғылымдарының кандидаты Қазыбек Дәуітәлиев белсенді қатысуда.
Өз сөзінде Қ.Дәуітәлиев: «Заң жобасы қоғамдық бақылауды жүзеге асырудың негіздерін қамтиды және қоғам өкілдеріне қоғамдық бақылауды жүзеге асыруға қатысуы үшін барлық жағдай жасайды», деді.
Өз кезегінде, Парламент Мәжілісінің депутаты Ерлан Саиров заң жобасының сапалы әзірленгенін жеткізді. Сондай-ақ депутат заң жобасы Парламент Мәжілісі қабырғасында қоғам өкілдерінің қатысуымен белсенді түрде талқыланатынына сенімін білдірді.
Талқылау барысында белгілі сарапшылар мен азаматтық қоғам өкілдері Айгүл Соловьева, Зәуреш Батталова, Рахым Ошақбаев, Серік Беркамалов, Евгений Жовтис және басқалар сөз сөйледі. Іс-шара соңында министр кездесудің барлық қатысушысына заң жобасын әзірлеуге белсенді қатысқандары үшін алғысын білдірді.