Шәкен Айманов атындағы «Қазақфильм» АҚ және Алматы Менеджмент Университетінің бірлескен құрылтайшылығымен Алматыда жаңа форматтағы Медиа және кино мектебі (Media & Film School) ашылды, деп хабарлайды Egemen.kz
Жаңа білім ордасының ашылуына орай баспасөз отырысы ұйымдастырылып, болашақ білім орталығының мақсат-маңызы туралы кеңінен әңгімеленді.
AlmaU Кәсіпкерлік Университеті нарық талаптары мен өзінің стратегиялық мақсаттарына сәйкес инновациялық білім беру бағдарламаларын құрастыруда. Қазіргі кезде сыни тұрғыдан ойлай алатын, этикалық құндылықтарға ие, терең білімі бар және жаңа технологияларды меңгерген мамандарға сұраныс жоғары болып отырған салалардың бірі – креатив индустрия, атап айтқанда, медиа және кино бағыты. Қазақстанда 40-тан астам журналистика мектебі мен 3 кино мектебі жұмыс істейтініне қарамастан, сапалы кадр мәселесі тапшы болып отыр.
Жаңа мектептің мақсаты – елдегі креатив индустрияның дамуына белсенді үлес қосатын, бұқаралық ақпарат құралдары мен кино нарығының заманауи талаптарына сай келетін мамандарды даярлау.Алғашқы студенттерді оқуға қабылдау 2021-2022 оқу жылында басталады. Жаңа мектептің басты міндеті – қажетті инфрақұрылымды қалыптастыру. Media & Film School мектебінің техникалық және интеллектуал базасын жасауға Ш.Айманов атындағы «Қазақфильм» АҚ киностудиясы атсалысатын болады.
AlmaU ректоры Ербол Сүлейменов жаңа мектептің артықшылығы жайлы «Қазақфильм» – өзіндік маңызды тарихы бар және қазіргі бағыттарды қалыптастыратын еліміздің басты киноалаңы. Осыған орай киностудия басшылығының біздің ынтымақтастық идеямызды қолдағанына қуаныштымыз» деп атап өтті. «Қазіргі таңда отандық кино саласы кәсіби мамандарға зәру. Технология және шығармашылық бағыты бүгінде тез өзгеріп жатқан заманда киноиндустрияда табысқа жету үшін әлемдік бағыт ағымдарға ғана сүйеніп қоймай, сонымен бірге өз ерекшелігімен таңғалдыру қажет. Мемлекет басшысы өз жолдауында білімнің қол жетімділігі мен сапасын арттырудың маңыздылығын атап өтті. Қазақстанның ең үздік университеттерінің бірі AlmaU-дің заман талаптарына дер кезінде жауап қататын осынау бастамаға серіктес болып бірлесе жұмыс жасап жатқанымызға қуаныштымыз», деді Ш.Айманов атындағы «Қазақфильм» АҚ вице-президенті Айдар Баталов.«Media & Film School бағдарламасына енгізілген пәндер әлемдегі жетекші оқу бағдарламаларына негізделеді, ал оқытушылары – кәсіби біліктілігі ғылыми-тәжірибелік жұмыстармен расталған мамандар. Биылдан бастап біз бірнеше мамандықтарды эксперимантті бағыт түрінде ашамыз, атап айтсақ: Креатив өнер оқу бағдарламасы, Жаңа медиа оқу бағдарламасы және Диджитал мәдениет оқу бағдарламасы деп аталатын 3 оқу бағдарламасы бойынша Диджитал кино режиссері және монтаж режиссері, диджитал гейм-дизайны, дата журналистика және мобил журналистика және диджитал кино сыны мамандары даярланатын болады», деді Media & Film School мектебінің деканы PhD Молдияр Ергебеков.
«Аризона Университетіндегі америкалық білім берудің жаңа технологиялары мен жоғары стандарттары, отандық кинематографистердің тәжірибесі мен Қазақфильм киностудиясының түсірілім алаңдары және AlmaU-дің мықты базасы – мұның бәрі Медиа және кино мектебінің қалыптасып жаңа сапаға жетуінің және еліміздегі медиа мен кино саласы үшін кәсібилерді даярлаудың кепілі», деп атап өтті Қазақстан киносыншылары қауымдастығының президенті Гүлнәр Әбікеева.
Сонымен қатар, спикерлер Медиа және кино мектебін дамыту жоспарлары туралы айтты. 2021-2022 оқу жылында мектеп жанынан медиа және кинематография саласындағы интердисциплинар зерттеулермен айналысатын Медиа және кино институты ашылады. Келесі жылы журналистика, теледидар және радиожурналистика, анимация, графикалық дизайн, драматургия және тағы да басқа мамандықтар ашылады.Баспасөз отырысы соңында Ш.Айманов атындағы «Қазақфильм» киностудиясының вице-президенті Айдар Баталов және AlmaU ректоры Ербол Сүлейменов Ынтымақтастық туралы Меморандумға қол қойды.
АЛМАТЫ