«Цифрлы Қазақстан» мемлекеттік бағдарламасы аясында осы жылы Шымкенттегі кәсіпорындарға 3,7 мың ақылды су есептегіш құралдары орнатылмақ. Бұл туралы «Су ресурстары-Маркетинг» ЖШС басшысы Анарбек Орман мәлімдеді.
Мекеме басшысының айтуынша, сумен жабдықтау және кәріз саласындағы өндірістік процестерде цифрландыру жұмыстары қарқынды жүргізілуде. Осылайша, жоба толықтай іске қосылса, коммерциялық құрылымдардың 86 пайызына адам факторының қатысуынсыз қызмет көрсетілетін болмақ.
«Алдағы 5 жылда барлық тұтынушыға ақылды су есептегіштер орнату жоспарланып отыр. Бүгінде қаладағы 7 243 заңды тұлғалардың 2,5 мың тұтынушысы электронды басқару функциясы бар «IC-card» ақылды су есептегішті пайдалануда», дейді мекеме басшысы.
Цифрлы технологиялар кәсіпорын қызметінің барлық саласында қолданылатынын айтқан серіктестік басшысының баяндауынша, цифрландырудың нәтижесінде тұрғындар суды үнемдей бастаған. Ал мекеменің халыққа қызмет көрсету сапасы жоғарылаған.
Бұдан бөлек, 2025 жылға дейін Шымкент қаласының геопорталына барлық саланың мәліметтері бірегей форматта жиналып, сумен, кәріз жүйесімен қамтамасыз ету жұмыстары жүз пайыз цифрлы форматқа көшпек. Бұл өз кезегінде су жүйесіндегі ақаулар мен жөндеу жұмыстарын онлайн бақылап, сервистік қызметтің сапасын арттыруға көмектеспек.
ШЫМКЕНТ