Төрт жылда бір дүркін өтетін жазғы Олимпия ойындары – әлемдік деңгейдегі ең ірі спорттық іс-шара. Мұндай дүбірлі дода кезекті рет былтыр (2020) Токио қаласында ұйымдастырылуы тиіс болатын. Әлемді жайлаған пандемиялық ахуалға байланысты бұл шара биыл, яғни шілде айының 24-і мен тамыз айының 9-ы аралығында өтетін болды.
Осы орайда айтпағымыз, көптеген зерттеуші Олимпия ойындарының басталу тарихы біздің заманымыздан бұрынғы 776 жылға тән дейді. Бірақ біздің заманымыздың 393 жылы Рим билеушісі І Теодосиус төрт жылда бір дүркін өткізілетін спорт ойындарын уақыт оздырып, адамдарды алдағаны және түкке де қажетсіз деп танып, тыйым салғаны жайлы нақты деректі білеміз. Бұл оқиғадан кейін ұзық жылдар бойы, нақтырақ айтқанда ХІХ ғасыр басталғанға дейін Олимпиада өткен жоқ.
Одан кейін әлемдік дүбірлі доданы қайта тірілтіп өмірге әкелген адам – Пьер де Кубертен. Ол 1863 жылы Францияда туған. Жеті жасқа толған 1870 жылы француз-неміс соғысы басталып кетіп, соғыстың не екенін қаршадай күнінен сезіп өскен жігіт мемлекеттер соғыспай-ақ бір-бірінің күш-қуатын сайыстыруға неге болмасын деп ой түйеді. Сөйтіп, бұл мақсатын іске асыруға кіріседі. Осы жолда көптеген қиындыққа да тап болады. Өзінің туа-бітті қайтпас қайсарлығының арқасында алған бетінен қайтпайды.
Көп жылғы еңбегінің нәтижесінде 1894 жылдың маусым айында Париж қаласында халықаралық үлкен конференция ұйымдастырып, алғашқы Олимпия ойындарын өткізу жайлы бір шешімге келеді. Тоғыз елден 70-ке тарта өкіл қатысқан аталған жиында Халықаралық Олимпиада комитетінің жарғысы, лауазымдық дәрежелер, әнұраны, эмблемасы, т.б. мәселелер күн тәртібіне қойылып, талқыға түседі.
Басқосудың соңғы күні алғашқы Олимпия ойындарын қайда өткізу жайлы өкілдер пікірі тыңдалып, ортақ келісім бойынша тарихта тұңғыш рет Олимпиаданы өткізуге Афина қаласы таңдалады.
Бірақ қаржы-қаражат жайын шешу тығырыққа тіреледі. Оның сыртында жарысқа қатысушы спортшылардың орын-жайы, ішер тамағы, спорттық құрал-жабдығын сайлап, сақадай сай ету ісі тұрды.
Әрине, мұның бәрі бастамашы Кубертен мырзаның иығына артылады. Бірақ алғашқы Олимпиада ойдағыдай өтіп, 20 жыл ұйқы-күлкі көрмей еңбектенген Кубертеннің маңдай тері ақталады.
Осылай Пьер де Кубертен жаңа заман Олимпиадасының негізін қалаушы ретінде тарихта қалды. Онымен қатар жүріп, барлық шаруаның ыстық-суығына бірге күйген досы Деметриус Векеласты да ұмыт қалдыруға хақымыз жоқ. Бұл адам Кубертенге қаржы-қаражат жағынан көп көмектескен көрінеді. Өйткені Векелас – бизнес саласында аты шыққан әрі жазушы ретінде де танымал тұлға. Осындай зор беделінің арқасында тұңғыш Халықаралық Олимпиада комитетіне басшы болып сайланған.