Ақ-қара түсті фотоның уақыт өткен сайын құны арта түседі. Басқасын айтпағанда, отбасылық альбомдағы сарғайған ескі суреттерді көздің қарашығындай сақтайсың. Парақтап отырып, сағымданған сол заманға барып қайтқандай әсерде боласың.
Әнеугүні отставкадағы полковник Дәулет Кәсенов жазушы Қалихан Ысқақтың бұрын-соңды жарыққа шыға қоймаған фотосын көрсеткен. Өзінің жеке қорында сақтап келген екен. Суретте әдебиеттің қара нары Қалихан Ысқақ туған ауылы Топқайыңның өр жағында журналиске сұхбат беріп отыр. Арғы жағындағы Қоңқай тауы да көзге оттай басылды.
– 1992 жылы Топқайыңда түсірілген фото. Үйдегі ескі альбомдардың арасында жатқан. Сұхбат алып отырған тележурналист Саниязбек Нұғыманов, – деді жаны руханиятқа жақын Д.Кәсенов.
Интернет дәуірі емес пе, жазушы мен журналистің осыдан отыз жылдай бұрын түсірілген ақ-қара фотосын әлеуметтік желіге жүктей қойғанмын. Сәлден соң Қалихан Ысқақтан сол заманда сұхбат алып отырған тележурналист Саниязбек Нұғыманов хабарласты:
– Осы фотоны іздеп таппай қойып едім, қайдан тауып алдың? – деді балаша қуанып. – Ол кездегі сұхбат басқаша болды-ау деймін... Есімде қалғаны: «Аға, демалысыңызда неге шетелдің тамашасын көрмедіңіз?» дегеніме: «Әй бауырым-ай, әр кімнің туған жері – Мысыр шаhaры емес пе?! Ал Катон мен үшін жер бетіндегі – жұмақ», деген еді. Эфирге шыққанда, сырлы сұхбат болған секілді еді. Одан бері отыз жыл өтті. Ұмытып та қалыппын, – деді ардагер тележурналист Саниязбек Нұғыманов.
Айтуынша, сол жолы ардагер журналист Катонқарағайда бұғы шаруашылығынан да репортаж жасаған екен. Жол-жөнекей Топқайыңға бұрылып, Қалихан Ысқақпен әңгімелесіпті. Қайта оралмайтын сол бір сәтті операторы фотоға тартып алған. «Бір сәт және бүкіл ғұмыр» деген осы шығар.
Шығыс Қазақстан облысы