Балтық жағалауында өтіп жатқан хоккейден әлем чемпионатының финалына Қазақстан құрамасымен бір топта ойнаған Финляндия мен Канада хоккейшілері шықты.
Қазіргі әлем чемпиондары плей-офф кезеңінде Чехия құрамасын 1:0 есебімен жеңсе, жартылай финалда Германия хоккейшілерінен басым түсіп (2:1), финалға жолдама алды. Ал Канада хоккейшілері плей-офф бәсекесінде Ресей құрамасын жарыстан шығарып жіберсе (2:1), жартылай финалда АҚШ-тан басым түсті – 4:2. Бір қызығы жартылай финалда В тобында өнер көрсеткен 4 құрама бақ сынады.
Әлем біріншілігінің қола жүлдесін АҚШ және Германия құрамалары сарапқа салады. Екі құрама арасындағы топтық кезеңдегі матчта АҚШ хоккейшілері 2:0 есебімен жеңіске жеткен болатын.