Жұқтырғанын білсе де жұрттың арасында жүр

Қаланың Санитарлық-эпидемио­логиялық бақылау департаментінің мәліметінше, жыл басынан бері Алматыда 65 878 адам індет жұқтырған. Өткен 2 аптада бұрынғы 2 аптамен салыстырғанда КВИ дерті 2,6 есеге артып, тәуліктік өсім 1%-дан асты. Тек 1-18 шілде аралығында КВИ-дің 10 093 жағдайы тіркелді. Өкінішке қарай, шамамен шілдеде 10 700-дей адам індетке шалдығуы мүмкін деген пессимистік болжамға сәйкес келіп отыр.

Дерттің өсу себебі белгілі – 18 мау­сым­нан бастап қалада «Дельта» нұс­қасы тарала бастады, мамандар оның өте жұқпалы әрі тез тарайтынын, клини­калық көріністері тым ауыр екенін алға тартып отыр.

Соңғы 7 күнде «симптомды» па­циент­тердің үлес салмағы бұрынғы 7 күндегі 88%-дан 90%-ға дейін өсті. Бұл өткен жылы эпидемияның бірінші толқы­ны кезіндегі COVID-19-дың «Ухань» нұсқасының 50%-на қарсы дерек.

Осыларды қаперге ала отырып, Алматы қалалық СЭБД мамандары КВИ жағдайы бойынша алдағы 3 айға, яғни 30 қыркүйекке дейін санитарлық-эпидемиялық ахуалдың дамуына болжам жасады. Базалық болжам бойынша дерттің шарықтау шегі 3-4 тамызға тура келеді әрі тәулігіне 1 600-ге жуық жаңа жағдай тіркелуі мүмкін. Пессимистік болжам бойынша дерттің шарықтау шегі 10-11 тамызға тура келеді, 1 900 жаңа жағдай тіркелуі мүм­кін. Базалық болжамға сәйкес 5-5,5 мың төсектік орын пайдаланылады, ал пес­симистік болжамның шарықтау шегі бо­йынша 6-6,5 мың төсектік орынға артуы мүм­кін. Демек базалық сценарий бойынша шілдеде – 27,5 мың, тамызда – 34,5 мың, қыркүйекте – 4,5 мың КВИ жағдайы, ал пессимистік болжамға сәйкес шілдеде – 29 мың, тамызда – 49,5 мың, қыркүйекте 13,5 мың КВИ жағ­дайы тіркелуі мүмкін.

Осындай жағдайда мектеп оқушыла­рының офлайн оқуын қамтамасыз ету үшін мониторинг жұмыстары жүргізіліп, мұғалімдер вакциналанып жатқанын білеміз. Бүгінде мұғалімдердің 97%-ы бірінші компонентпен, 67,9%-ы екінші компонентпен вакциналанды. Бұған қоса медициналық қызметкерлердің 97,3%-ы бірінші компонентпен, 67,3%-ы екінші компонентпен вакциналанды.

Соңғы 2 аптадағы жас құрамын талдау балалар мен жасөспірімдерде вирустың «Дельта» нұсқасының тез жұғатынын дәлелдеп отыр. 14 жасқа дейінгі балалардың үлес салмағы 1%-ға өскен және жоғары болып қалуда – 14%. 20 жастан 40 жасқа дейінгі азамат­тардың дерт жұқтыруы төмендеді, 39%-дан 37,5%-ға дейін. 40-59 жастағы науқастардың үлес салмағы жоғары – 25%. Ал 60 жастағы адамдар арасында жұқтырғандардың үлесі 1,1%-ға өскен.

Жұмыспен қамту бойынша соңғы 14 күнде КВИ жұқтыру көрсеткіші өзін өзі жұмыспен қамтығандар арасында жоғары – 41%, түрлі ЖШС, ЖК, АҚ жұмысшылары арасында – 17%, зейнеткерлер арасында – 16,4%, мектеп оқушылары арасында – 9,2%, мектеп жасына дейінгі балалар арасында – 6,4%.

Соңғы 7 күнде КВИ жиі жұғатын жерлер тағы да сараланып, сауда нысандары – 40%, қоғамдық көлік – 20%, отбасылық байланыс – 19%, базарлар 16% екені анықталды.

Соңғы мәлеметтерге сәйкес, Алма­тыда 2 282 қатысушы Ashyq жоба­­сы бойынша жұмыс істейді. 9-14 шілде аралығында нысандарда QR-кодын (тіркеу) пайдаланып келу­шілерді тіркеудің минималды санын жүр­гізбеген фактілер анықталмады. 100 шақ­ты қатысушы Ashyq жобасына белсен­ділікпен қатысып отыр. 26 сәуір мен 14 шілде аралығында 211 жауапсыз қатысушы жобадан шығарылды.

Ал 9-14 шілде аралығында Ashyq-та сканерлеу кезінде «қызыл» мәртебесі бар 31 адамға өзін өзі оқшаулау режімін бұзғаны үшін 30 АЕК айыппұл салынды. Жалпы алғанда, 28 сәуір мен 14 шілде аралығында өзін өзі оқшаулау режімін бұзғаны үшін «қызыл» мәртебеге ие 65 адамға 30 АЕК көлемінде айыппұл салынды.

Тәртіп бұзушылар көбінесе қоғамдық тамақтану орындарына кіруге тырысады, мұнда 58 адамнан «қызыл» және 13 адамнан «сары» мәртебе анықталған. СОО кіреберісінде 28 адамның «қызыл» және 110 адамның «сары» мәртебесі белгілі болды. «Қызыл» мәртебесі бар 9 адам Алматы әуежайына өтпекші болды.

Сондықтан КВИ-дің одан әрі таралуын болдырмау жөніндегі қалалық штаб амбулаториялық емделіп жатқан қала тұрғындарын өзін өзі оқшаулау режімін бұзбауға және қоғам алдында азаматтық жауапкершілік танытуға шақырады.

АЛМАТЫ