Елімізде халықтың әлеуметтік жағдайын жақсартып, оның өмір сүруіне қолайлы жағдай жасау – мемлекеттік саясаттың басым бағыттарының бірі. Сол себепті ірі қалаларда ғана емес, шалғай ауылдарда да тұрғындардың таза ауыз су, сапалы жол мен табиғи газ секілді игіліктерге қол жеткізуі өте маңызды. Осы орайда «ҚазТрансГаз» акционерлік қоғамы Түркістан облысының әкімдігімен бірлесіп, Сарығаш және Қазығұрт аудандарында орналасқан 19 елді мекенді табиғи газбен қамту жұмыстарын қысқа мерзімде атқарып шықты.
Президент Қасым-Жомарт Тоқаев шекара маңында орналасқан Сарыағаш ауданы Бағыс ауылының әлеуметтік мәселелерін тездетіп шешу, соның ішінде ауылды табиғи газбен қамтамасыз ету жөнінде нақты тапсырма берген болатын. «ҚазТрансГаз» ұлттық компаниясы жергілікті әкімдікпен бірлесе отырып Мемлекет басшысының тапсырмасын ең қысқа мерзімде – 2021 жылдың мамыр-тамыз айларының аралығында орындап шықты. Күні кеше Сарыағаш ауданы Ақжар ауылдық округіне қарасты Бағыс ауылының тұрғындары табиғи газға қосылу мүмкіндігіне ие болды.
– Шекара сызығының бойында орналасқан Бағыс ауылы Қазақстан мен Өзбекстанның өзара келісімінің нәтижесінде Қазақстан аумағына қосылғаны белгілі. Биыл Үкіметтің арнайы қаулысы жарық көріп, ауылымыз Түркістан облысының картасына енді. Көктемде Президент Қасым-Жомарт Тоқаев біздің ауылдың әлеуметтік мәселелерін шешу жөнінде тапсырма бергенін естіп, қуанып едік. Міне, сол тапсырма орындалып, халық қуанышқа бөленіп жатыр. Мемлекет басшысының тапсырмасын тиянақты орындап шыққан «ҚазТрансГаз» компаниясына және Түркістан облысының, Сарыағаш ауданының әкімдігіне алғысымызды білдіреміз, – деді табиғи газдың алауын салтанатты жағдай жаққан Бағыс ауылының биі Абидулла Құсайынов.
Жалпы, бүкіл республикаға шипалы суымен танымал Сарыағаш ауданында 72 елді мекен бар. Бүгінге дейін соның 42-сі көгілдір отынға қол жеткізген. Яғни елді мекендердің газбен қамтылу көрсеткіші 58 пайызды құрайды. Ал Қазығұрт ауданындағы 64 ауылдың 44-і табиғи газға қосылған. Бұл аудандағы газдандыру көрсеткіші – 68 пайыз.
Жақында Сарыағаш ауданда «Таскескен» және Қазығұрт ауданында «Қақпақ» автоматтандырылған газ тарату стансаларының құрылысы аяқталып, пайдалануға берілді. Осылайша, қос аудандағы Қызылсеңгір, Тұғыр, Заңғар, Қақпақ, Сырлысай, Бағыс, Шымырбай, Дарбаза, Жаңаталап, Тегісшіл, Таскескен, Мәдениет, Мәдениет-2, Жылысу, Ақүй, Дастан, Алғабас, Құркелес және Таскескен-2 елді мекендеріне көгілдір отын жеткізілді.
– «Қақпақ» және «Таскескен» стансаларымен қоса, 300 шақырымға газ құбыры тартылды. Бұл 19 елді мекендегі 22 мыңнан астам халықты газбен қамтуға мүмкіндік беріп отыр. Бұл елді мекендерде 5 мыңнан астам отбасы мен 250 әлеуметтік, кәсіпкерлік нысандары бар. «ҚазТрансГаз» компаниясы бұл стансалардың, одан тарайтын құбырлардың барлық техникалық және қауіпсіздік нормаларына сәйкес салынуын қадағалады. Біз халыққа үздіксіз, қауіпсіз және авариясыз газ берілуіне атсалысамыз. Газ – тиімді де пайдалы отын, бірақ оны пайдалану кезінде қауіпсіздік шаралары бірінші кезекте тұруы керек, – дейді «ҚазТрансГаз Аймақ» АҚ-ы Түркістан өндірістік филиалының директоры Шалқар Омарбеков.
Болашақта «Таскескен» автоматтандырылған газ тарату стансасынан көршілес Келес ауданының 6 елді мекеніне де табиғи газ жеткізілмек. Айта кетейік, бүгінде Келестегі 83 ауылдың 39-ы табиғи газға қосылған.
Ш.Омарбековтің айтуынша, қазір автоматтандырылған газ тарату стансасына жалғанған барлық ауылға табиғи газ келіп тұр. Бірінші кезекте Сарыағаш ауданындағы Бағыс және Тегісшіл ауылдары табиғи газға қосылған. Ендігі жерде тұрғындар газды көшеден үйіне дейін кіргізу үшін «ҚазТрансГаз Аймақ» компаниясымен келісімшарт жасап, арнайы бекітілген жобаға сәйкес құрылыс-монтаж жұмыстарын жүргізуі тиіс. Есептеуіш құралдар орнатылып, арнайы пломба соғылғаннан кейін табиғи газды пайдалануына болады.
Жалпы, Түркістан облыстық энергетика басқармасының мәліметіне сүйенсек, облыстағы 843 елді мекеннің 423-і газдандырылған. Биыл облыста осы бағытқа 14 млрд теңге бөлінген. Түркістан облысын дамытудың кешенді жоспарына сәйкес, 2026 жылға дейін өңірдегі елді мекендерге табиғи газ жеткізу үшін 90 млрд теңге бөлу жоспарланған. Нәтижесінде, алдағы бес жылда Түркістан облысының аумағы толығымен газдандырылады деп жоспарланған.
Мамандардың айтуынша, табиғи газ – бүгінде күні ең таза органикалық отын болып есептеледі. Сондықтан Түркістан облысында елді мекендерді газдандыру жүйелі түрде жүргізілуде. Бұл зиянды қалдықтар көлемін айтарлықтай азайтуға, өңірдің экологиялық жағдайын едәуір жақсартуға мүмкіндік береді. Сонымен қатар табиғи газды пайдалану тұрғындар үшін қаржылық жағынан да тиімді екені белгілі.
Айдар ҚҰЛЖАНОВ
Түркістан облысы