«Ауылдағы азаматтық бастамаларды дамытуға бағытталған іс-шаралар кешенін ұйымдастыру» жобасын іске асыру аясында Қызылорда облысының Әйтеке би және Жалағаш аудандарында мүгедектігі бар балаларды әлеуметтендіру және өскелең ұрпақтың қаржылық сауаттылығын арттыруға арналған жобаларды іске асыру басталды.
Азаматтық бастамаларды қолдау орталығының баспасөз хатшысы Сәкен Құбышевтың айтуынша, бұл өңірдегі тоғыз жобаның екеуі – шағын гранттар байқауының жеңімпаздары. Олар ауылда бастамаларды іске асыруға және дамытуға 500 мың теңге алды. Сараптама комиссиясы 433 өтінімнің ішінен конкурс шарттарына сай келетін үздік 60 жобаны іріктеп алды.
Қазалы ауданы, Әйтеке би ауылындағы «Шапағат» қоғамдық бірлестігі осы ұйымда тәрбиеленіп жатқан мүгедек балаларды сенсорлық интеграциялауды ұсынды. Олармен тәулік бойы үш топ жұмыс істейді – ЕДШ мамандары, невропатолог, психолог, дефектолог және логопед. ҮЕҰ басшысы Шынаркөл Жеңсікбаеваның айтуынша, конкурста жеңіп алған 500 мың теңге сенсорлық жабдықты сатып алуға жұмсалды:
«Біз 90 адамды қамтуды жоспарлап отырмыз. Бұл – 3 жастан 18 жасқа дейінгі балалар және олардың ата-аналары», дейді ол.
Жалағаш ауданының Жаңаталап ауылында тұратын бастамашыл топтың белсендісі Жанарыс Түбекбаев ауыл жастарының қаржылық сауаттылығы туралы ой қозғады. Ол гранттық қаражатты бейне сабақтарды түсіру және оларды www.kbh-finance.kz сайтында орналастыру жұмыстарын әзірлеуге жұмсаймыз деп шешкенін, сондай-ақ барлық атқарылатын шараларды ойластыра отырып, ауылдық жерлерден келген 600 бала мен жасөспірімді қамтуға дайын екенін жеткізді.
«Жобаның барлық қатысушылары қорытынды сауалдама мен тестілеуден өтеді. Үздік көрсеткіштері бар оқушылар инвестициялық сауаттылықты одан әрі дамытуға мүмкіндік алады», дейді ол.
Сонымен қатар Жанарыс Тубекбаевтың жоспарында ауылдағы әлеуметтік осал топтарына жататын адамдардың өз бос уақытын ұтымды пайдалануға үйрету; отбасылық өмірдің экономикалық моделін құруға дайындау; оларды алаяқтар мен құмар ойындардың әсерінен қорғау мәселелері де бар.
Айта кетейік, «Ауылда азаматтық бастамаларды дамытуға бағытталған іс-шаралар кешенін ұйымдастыру» республикалық жобасы Ақтөбе облысының ҮЕҰ қауымдастығы Азаматтық бастамаларды қолдау орталығы мен Ақпарат және қоғамдық даму министрлігінің қолдауымен жүзеге асырылуда.
«Егемен-ақпарат»