Кәсіпкер, Technonikol корпорациясының тең дәрежелі иесі Игорь Рыбаков (байлығы - Forbes нұсқасы бойынша 2 миллиард доллар) Қазақстанның қайырымдылық жобаларына 100 мың доллар берді. Бұл қаржы «Аналар үйі» мен Iqanat білім беру қорына 50 мың доллардан берілді, деп хабарлайды Egemen.kz.
«Мен «Аналар үйі» жобасы туралы естігенде, оның қаншалықты қарапайым және тиімді екеніне таң қалдым. Балалар үйінде тәрбиеленушілерге сыйлық берудің қажеті жоқ. Керісінше олардың балалар үйіне түспеуін қадағалау керек. Ал Айдын Рахымбаев дәл осылай істейді. Менің ойымша, бұл тек Қазақстанда ғана емес, бұрынғы Кеңес Одағының бүкіл аумағында таратылатын тамаша жоба. Мұндай жоба Ресейде де пайда болуы керек», дейді Игорь Рыбаков.
Ол өзінің жас кезінде Қазақстандағы құрылыста жұмыс істегенін мысал еткен. Сол жұмысы үшін 1300 рубльден астам жалақы алып отырған. «Мен ең алғаш жұмыс істеп, Қазақстанда ақша таптым, енді оны қайтарып жатырмын», дейді Игорь Рыбаков.
Игорь Рыбаков ақшаны аудару туралы шешімді қазақстандық миллионер Айдын Рахымбаевпен сұхбаты кезінде қабылдады. Forbes Kazakhstan басылымының жазуына қарағанда, Игорьге қазақстандық бизнесмендердің қайырымдылық жобалары ұнап қалған.