1 Мамыр мерекесін біз мемлекеттік мерекелер қатарында қалдырып отырмыз, өйткені, ол халықтың төл мерекесіне айналды. Ары-беріден соң бұл Наурыз мерекесінің заңды жалғасы іспеттес. Қазақстан халқының бірлігі күнінің ерекше аталып өтуінің өзі қоғамымыздың нығайып, қалыптасып болғанын көрсетеді.
Қазақстан халқының бірлігі күнін ерекше әспеттеу еліміз үшін не береді дегенге келсек, әзірге Қазақстан халқын қазақтілділер мен орыстілділер деп санамаса, ешкім ешкімді ұлтына және басқа да ерекшеліктеріне қарап бөліп жатқан жоқ. “Мен ешқайда кетпей, Қазақстанда қалдым, сондықтан маған ерекше көзқарас керек”, дейтін уақыт та әлдеқашан өтіп кеткен. Елден кеткендер кетіп, қалғандары қазақстандық болып қалып, қоғам орныға бастады.
Көп ұлтты халықтың тарихы да бір. Біз көптеген қиындықтардан бірге өттік. Әсіресе, қазақ халқының басынан өткерген қиындықтары жетерлік, соның ішінде жоңғарлармен соғыс ауыр тигені баршамызға аян. Қайсар халық елін, жерін аман алып қалды. Тәуелсіздік алуымыздың өзі кезекті тарихи кезең. Кеңестік кезеңнен қалған экономиканы жаңа сатыға көтерудің өзі оңай болған жоқ...
Негізгі мақсатымыз – дамыған экономикасы бар, тұрақтылығы мығым Қазақстан құру. Тұрақтылықты сақтай отырып, ұрпағымызға, бала-шағамызға артымызда дамыған, өркендеген ел қалдыруымыз керек. Тәуелсіздік алғаннан кейінгі жылдары Мемлекет басшысы Нұрсұлтан Назарбаев этносаралық қарым-қатынастарды ары қарай дамытуға ерекше маңыз берді. Бұл – қажет үдеріс еді. Қазақ тілі мен мәдениетін өркендетумен қатар, өзге этностардың төл тілі мен мәдениетін назардан тыс қалдырмау мәселесі де сол кездерде қолдау тапты. Осы мақсатпен 1995 жылы Қазақстан халықтарының (кейін халқы деп аталатын болды) Ассамблеясы құрылғаны белгілі. 2007 жылы Конституцияға енгізілген өзгерістерге сәйкес, еліміз жоғарғы заң шығарушы органына Ассамблеядан әр түрлі этностардың ішінен сайлануға 9 орын берілді. Соның ішінде өзімнің де бар екенімді айта кетуім керек.
Осы ретте қай этностан сайланған депутат солардың мүддесін күйттеп кетеді, деген де жаңсақ пікірлер туындады. Бұл орайда Мемлекет басшысы Ассамблеядан сайланған депутаттар ешқандай ұлттың мүддесін қорғамайды, біртұтас халықтың қамын қарастыратын болады дегенді ашып айтты. Қазір Ассамблея жанынан сарапшылар кеңесі құрылып отыр. Жалпы, мұнда соңғы жылдары сарапшылар мен ғалымдар тартылып, оның жұмысын жаңа деңгейге көтерді. Менің пайымымша, Ассамблея өскелең ұрпақ тәрбиесіне ерекше ден қоюы керек. Жастар өз елінің патриоттары болуы тиіс. Әрине, отансүйгіштік отбасылық тәрбиеден басталуы керектігі айтпаса да түсінікті. Сол секілді туған жерге деген құрмет те мемлекеттік тілді білуден басталады. Оны білу талап тұрғысынан қолға алынғаны жөн. Ересек жаста қалай үйренеміз дегендер де бар. Бірақ мен оларға үнемі айтып жүремін, егер тілді үйрене алмасаң да дәстүр мен салтты құрметтеуге міндеттісің деп.
Міне, өзара сыйластық осындай игі дәстүрлердің қалыптасуына өзіндік жол салады. Қазақ мәдениеті мен тілі жалпымыздың діңгегіміз болса, соны білу арқылы біз өзіміздің де төл мәдениетіміз бен тілімізді тани бастаймыз. Елді, жерді сүю халқымыздың ортақ игілігін сақтай білу басты мақсатымыз болуға тиіс.
Егор КАППЕЛЬ, ҚХА-дан сайланған Мәжіліс депутаты.