Нұр-Сұлтанда өтіп жатқан WTA 250 Astana Open турнирінде Зарина Диастың жеңісті жолын Юлия Путинцева жалғастырды.
Әлемнің 47 ракеткасы Юлия Путинцева грузиялық Екатерина Горгодземен кездесті. 29 жастағы Қап тауы бөктерінен келген бұрымдының бағындырған пәлендей белестері жоқ. Бұл күндері ол үздіктер рейтингінде 162-орынға табан тіреуде. Ортаң қол ойыншыны ұту Путинцева үшін айтарлықтай қиындық туғызған жоқ – 6:1, 6:2. Енді Юлия беларуссиялық Вера Лапкомен кездеседі.