Тоғызқұмалақ Қазақстан егемендігіне қол жеткізген жылдан бері қарқынды дамып келеді. Бұл жерде елімізде құрылған Тоғызқұмалақ федерациясының ықпалы зор болып отыр. Бүгінгі таңда осы қауымдастықтың арқасында елдің түкпір-түкпірінде үйірмелер ашылып, тоғызқұмалақтан жарыстар жиі өткізіліп жүр.
Жақында Қазақстан Республикасы Қарулы Күштерінің «Астана» өңірлік қолбасшылығы әскерлеріне қарасты 06708 әскери бөлімінде тоғызқұмалақтан жарыс ұйымдастырылды. Сайыс сарбаздар мен оқушылар арасында өрбіді. Сарбаздар қатарын 06708 әскери бөлімнің мерзімді әскери қызметтегі әскери қызметшілері құраса, оқушылар легін коммуналдық мекемесінде білім алып жүрген тоғызқұмалақты үйренуші жас жеткіншектер толықтырды. Аса тартысты өткен ұлттық өнер сайысында алға суырылып шыққандар қатары анықталды.
Ақтық сында тамаша өнер көрсеткен Қарағанды облысы білім басқармасының Приозерск қаласы білім бөлімінің «№1 жалпы білім беретін мектебі» коммуналдық мемлекеттік мекемесінің 9 «б» сынып оқушысы Алина Кәрімова жарыс жеңімпазы атанды. Ал жүлделі ІІ орынды 06708 әскери бөлімінің қатардағы жауынгері Айдын Кенжебай иеленсе, ІІІ орын 06708 әскери бөлімінің қатардағы жауынгері Дәурен Тазабаевқа бұйырды.
Айта кетерлік жайт, осы тоғызқұмалақ сайысының жеңімпазы Алина Кәрімова биылғы онлайн форматында өтетін VII республикалық «Айбын-2021» әскери-патриоттық жиынының бағдарламасына енгізілген тоғызқұмалақ сайысында бағын сынамақшы.
Ендеше, әскери ортада өткен жарыста жеңістің биік тұғырына көтерілген Алинаға сәттілік тілейміз!
Тілек КЕНЖЕБЕКОВ